Elimizde úsh aýysymda oqytatyn neshe mektep bar

ASTANA. QazAqparat – Qazaqstanda 70-ten astam mektep apatty dep tanyldy, dep habarlaıdy QazAqparat tilshisi.

«Qazirgi tańda elimizde 71 mekteptiń ǵımaraty apatty dep tanylǵan. 136 mektep úsh aýysymda oqytady», - delingen Oqý-aǵartý mınıstrliginiń «QazAqparat» agenttigine bergen jaýabynda.

Bul turǵyda vedomstvo qaı óńirlerde úsh aýysymdaǵy jáne apatty mektepter máselesin sheshý kerek ekenin naqtylady.

«Problemalyq mektepterdiń sany Almaty (53), Batys Qazaqstan (26), Túrkistan (20), Mańǵystaý (17), Atyraý (16) oblystarynda basym», - dep atalyp ótken mınıstrlik aqparatynda.

Budan buryn habarlanǵandaı, 2025 jyly úsh aýysymdy jáne apatty jaǵdaıdaǵy mektepter problemasyn tolyq sheshý josparlanǵan.

Bıyl Atyraý oblysynda apatty mektepter problemasy tolyq sheshiledi.

Shymkentte de úsh aýysymdy mektepterdiń máselesi osy jyly tolyǵymen sheshiledi.