Elimizde týrıstik keshbek mólsherin belgileýdiń jańa mehanızmi usynyldy

ASTANA. QazAqparat - Joba boıynsha keshbek mólsherin týrısterdiń qansha kún demalǵanyna baılanysty belgileý usynylady. Máselen, 1 túnegen týrıstke týr qunynyń 5%-y mólsherinde ótemaqy tóleý usynylady. Al, 2 kún demalyp, túnese týr qunynyń 10%-yn, 3 kún túnese 15%-yn qaıtaryp alady. Eń joǵary - 20% keshbek 4 jáne odan artyq kún demalǵandarǵa beriledi, dep habarlaıdy QazAqparat.

Mádenıet jáne sport mınıstrliginiń málimetinshe, mehanızm «tómen» maýsym kezeńindegi týrlarǵa baǵyttalǵan, bul - bıznesti, halyqty jáne nómirlik qordyń tolymdylyǵyn qoldaý maqsatynda usynylyp otyr.

Týrıstik keshbek týroperatorlarmen qatar marketpleısterden satylyp alynǵan týrlarǵa da tólenedi. Marketpleıster keshbekti óz qarajaty esebinen tóleıdi. Memleket keıin bul shyǵyndy ótep beredi.

Al, týroperatordan oflaın formatta satyp alǵan jaǵdaıda memleket keshbekti tikeleı týrıstke qajetti qujattar men ótinimdi jınaqtap joldaǵan bette onyń esepshotyna jiberetin bolady.

Búgingi tańda atalǵan erejeler jobasy ázirlenip, týrıstik naryq ókilderimen talqylaý júrip jatyr.

Mehanızm aıasynda jobaǵa qatysýshylarǵa eń tómengi talaptar qoıylyp otyr. Týroperatorlar úshin ol - ishki týrızm salasyndaǵy týroperatorlyq qyzmetke lıtsenzııanyń bolýy. Al, marketpleıs -otandyq ónim jáne týrıst pen týroperator úshin yńǵaıly bolýy tıis.

«Qazaqstanda ishki týrızmdi odan ári yntalandyrý maqsatynda týrıstik «kesh bek» engizý usynylyp otyr. Bul tıimdiligimen tanylǵan álemdik tájirıbe. El ishinde demalýshylar týr qunynyń 20% - na deıin qaıtaryp ala alady. Bul shara uıymdastyrylǵan demalys mádenıetin damytýǵa jáne el ishinde saıahattaýdyń qoljetimdiligin arttyrýǵa múmkindik beredi»,- dedi QR MSM Týrızm ındýstrııasy komıteti tóraǵasynyń mindetin atqarýshy Nurtas Káripbaev.