Elimizde týberkýlezben aýyratyndardyń jartysynan astamy - eńbekke qabiletti jastar

ShYMKENT. QazAqparat - Ótken jyly Shymkentte týberkýlez boıynsha epıdemıologııalyq jaǵdaı salystyrmaly túrde turaqty boldy. Degenmen 14 jasqa deıingi balalar arasynda 7 jaǵdaıǵa jáne jasóspirimder arasynda 10 jaǵdaıǵa artty, dep habarlaıdy QazAqparat.

Sanıtarııalyq-epıdemıologııalyq baqylaý komıtetiniń málimetinshe, bıylǵy eki aıda qalada týberkýlezdiń 40 jaǵdaıy tirkelip, aýrý kórsetkishi 26 (40%) jaǵdaıǵa, onyń ishinde ókpe týberkýlezi ótken jyldyń uqsas merzimimen salystyrǵanda 18 jaǵdaıǵa tómendegen.

Aýrý 14 jasqa deıingi balalar men jasóspirimder arasynda tirkelmedi.

Týberkýlez ınfektsııasy (95%) aýrýdyń belsendi túrimen aýyratyn naýqastardan aýa tamshylary arqyly juǵady.

Týberkýlezdiń belgileri: 2 aptadan astam jótel, dene qyzýynyń kóterilýi, keýdedegi aýyrsyný jáne qysylý, dene salmaǵyn jáne tábet joǵaltý, túngi ýaqytta terleý, álsizdik jáne qatty sharshaý. Eń aldymen ókpe zaqymdanady, basqa da organdardyń zaqymdanýy yqtımal.

Aldyn alý jáne dıagnostıkalyq maqsatta eresekter men balalar arasynda týberkýlezdi erte anyqtaý úshin flıýorografııalyq zertteýler men mantý synamasy júrgiziledi.

Naýqasty kesh anyqtaǵan kezde týberkýlezdiń batsıllıarly nemese asqynǵan túri qoǵam úshin óte qaýipti bolýy múmkin.

Ýaqtyly emdelmegen jaǵdaıda týberkýlezdiń belsendi túrimen aýyratyn naýqastar jylyna 10-nan 15 adamǵa deıin aýrýdy juqtyrýy yqtımal.

Naýqastardyń 54% - eńbekke qabiletti 18-44 jas aralyǵyndaǵy adamdar.

Týberkýlez taıaqshasy qorshaǵan ortada, ásirese qaqyryq pen topyraqta edáýir uzaq ýaqyt saqtalady.

Aýrýdyń belgileri paıda bolǵan jaǵdaıda turǵylyqty jeri boıynsha nemese oqý orny boıynsha medıtsınalyq mekemege ýaqtyly júginý qajet.

Týberkýlezdiń aldyn alýdyń eń tıimdi jáne balamasyz ádisi – vaktsınatsııa.

QR Ulttyq profılaktıkalyq ekpe kúntizbesine sáıkes barlyq ekpeler tegin, egiletin eresek adamnyń nemese balanyń ata-anasy jáne/nemese zańdy qamqorshysy erikti túrde jazbasha bergen kelisimimen, arnaıy oqyp-daıyndalǵan jáne ruqsaty bar medıtsına qyzmetkeri adamnyń deni saý kezinde egedi.

Týberkýlezge qarsy BTsJ vaktsınasy (Kalmet-Geren taıaqshasy) iri qara mal týberkýleziniń taıaqshasynyń álsiregen tiri shtamynan daıyndalady. Ol jasandy ortada arnaıy ósiriletindikten adamdar úshin qaýipsiz.