Elimizde tótenshe jaǵdaıda jedel áreket etetin jańa áskerı bólim qurylmaq

ASTANA. QazAqparat – Qazaqstanda túrli tótenshe jaǵdaılar kezinde dereý áreket etetin jańa arnaıy bólim qurylýy múmkin. Bul týraly «Ashyq» NQA portalynda jarııalanǵan Úkimet qaýlysynda kórsetilgen, dep habarlaıdy QazAqparat tilshisi.

«QR Tótenshe jaǵdaılar mınıstrliginiń 20982 áskerı bólimi respýblıkalyq memlekettik mekemesi qurylsyn. Jobanyń maqsaty - halyqty, aýmaqty jáne ekonomıka obektilerin túrli avarııalardan, tabıǵı jáne tehnogendik apattardan qorǵaýdy qamtamasyz etý, sondaı-aq TJM áskerı bólimderiniń tabıǵı jáne tehnogendik sıpattaǵy tótenshe jaǵdaılarǵa jedel den qoıý múmkindikterin arttyrý. Ol úshin soltústik, ońtústik, batys jáne shyǵys óńirlik qaǵıdaty boıynsha Aqtóbe qalasynda áskerı bólim qurý jáne azamattyq qorǵanys áskerı bólimderiniń shtattaryn bekitilgen úlgilik shtatqa keltirý boıynsha uıymdyq-shtattyq reforma júrgizý kózdeledi», - delingen qaýlyda.

Qujatta kórsetilgendeı, bólimdi qurý úshin respýblıkalyq bıýdjetten 14,6 mlrd teńge jumsalmaq. Atap aıtqanda, 2023 jyly - 4,8 mlrd, 2024 jyly - 4,8 mlrd jáne 2025 jyly - 4,8 mlrd teńge baǵyttalady.

Qaýylyny ashyq talqylaý 22 jeltoqsanǵa deıin jalǵasady.