Elimizde tolyqqandy memlekettik sý kadastry bolmaı tur - Erlan Qoshanov
«Qazirgi kezde sý aǵyndary men sý aıdyndarynyń rejımin zerdeleý úshin nebári 310 gıdrologııalyq beket jumys isteıdi. Jalpy, mundaı beketter 800-den asýy qajet. Tolyqqandy memlekettik sý kadastry joq deýge bolady. Osynyń bári sý resýrstarynyń sandyq jáne sapalyq jaı-kúıine monıtorıng júrgizýdi, ekonomıka salalarynyń sýmen qamtamasyz etilýi boıynsha anyq teńgerimniń bolýyn qıyndatady», - dedi E.Qoshanov Májilistegi parlamenttik tyńdaý barysynda.
Sonymen qatar ol sý paıdalaný salasyndaǵy vedomstvoaralyq úılestirý máselesine toqtaldy.
«Sý sharýashylyǵy ınfraqurylymy ártúrli memlekettik organdardyń qaraýynda. Bul sý resýrstaryna qatysty tıimdi saıasat júrgizýdi qıyndatady. Máselen, sýmen jabdyqtaý kózderi (jerasty, jerústi) men toptyq sýtartqyshtarǵa Ekologııa, geologııa jáne tabıǵı resýrstar mınıstrligi jaýap beredi. Eldi mekenderdi sýmen jabdyqtaýdy damytýǵa Indýstrııa jáne ınfraqurylymdyq damý mınıstrligi jaýapty. Josparlaý, salý jáne odan ári paıdalaný jergilikti atqarýshy organdardyń quzyrynda. Aýdandar men aýyldyq okrýgterdiń ákimdikteri arasyndaǵy basqarýdyń júıesizdigi biryńǵaı tehnıkalyq, kadrlyq, tarıftik saıasattyń bolmaýyna alyp keledi», - dedi Májilis tóraǵasy.
Budan buryn habarlanǵandaı, 2040 jylǵa qaraı Qazaqstanda sý tutyný 46 paıyzǵa artady.
«Іshki sý saıasaty kúshti bolmasa, kórshi eldermen tıimdi sý dıplomatııasyn jolǵa qoıý múmkin emes. Qazaqstan aýmaǵynyń sýmen qamtamasyz etilýi ózen aǵysy boıynsha joǵary ornalasqan kórshi memleketterdiń sý saıasatyna baılanysty. Sondyqtan transshekaralyq nysandardy birlesip paıdalanýǵa, memleketaralyq sý qatynastaryn jetildirýge ekologııalyq qana emes, ulttyq qaýipsizdikti qamtamasyz etýdiń mańyzdy sharttarynyń biri retinde qaraǵan jón. Kórshi eldermen ózara tıimdi yntymaqtastyq ornatý Qazaqstannyń sý qaýipsizdigin qamtamasyz etýdegi negizgi faktor bolýy tıis», - dedi Májilis tóraǵasy.