Elimizde terrorızmdi qarjylandyrýǵa qarsy is-qımyldar aıqyndaldy
«Zań jobasyn ázirleý qajettigi 2021-2022 jyldary Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl jónindegi Eýrazııalyq toptyń bizdiń eldi baǵalaýynyń ekinshi raýndyna daıyndalýǵa baılanysty týyndap otyr», - dedi QR Premer-Mınıstriniń birinshi orynbasary - Qarjy mınıstri Álıhan Smaıylov.
Zań jobasynyń maqsattaryna toqtalsaq, birinshiden, halyqaralyq standarttardy engizý jáne qarjy monıtorıngi salasynda ulttyq júıeni odan ári jetildirý eskerilgen.
«Osyǵan baılanysty klıentti tıisinshe tekserý, ishki baqylaý júrgizý jáne kúmándi operatsııa týraly habarlama jiberý sııaqty qarjy monıtorıngi rásimderine ózgerister usynylady. Qarjy monıtorıngi salasyndaǵy ýákiletti organǵa retteýshi memlekettik organy joq qarjy monıtorıngi sýbektilerine qatysty ákimshilik quqyq buzýshylyq týraly hattamalardy toltyrýǵa quzyret beriledi. Blankettik normalardy joıý maqsatynda qarjy monıtorıngi sýbektileriniń ákimshilik quqyq buzýshylyqtar quramy qaıta qaraldy, táýekelderdi taldaý negizinde sanktsııalar azaıtyldy», - dedi ol.
Onyń sózine qaraǵanda, qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl salasyndaǵy ýákiletti organdar úshin halyqaralyq ózara is-qımyl rásimderi, onyń ishinde qylmystyq aktıvterdi izdestirý jáne qaıtarý boıynsha rásimder reglamenttelgen.
«Halyqaralyq standarttardy iske asyrý maqsatynda zań jobasyna kommertsııalyq emes sektordy terrorızmdi qarjylandyrý maqsatynda paıdalanýdan qorǵaýǵa baılanysty novellalar engizildi. Talaptar erikti qarjylyq jáne basqa da qaıyrymdylyqtar úshin júginetin qaıyrymdylyq uıymdary men dinı birlestikterge qoldanylatyn bolady. Aqshany jylystatýǵa jáne terrorızmdi qarjylandyrýǵa qarsy is-qımyl máseleleriniń mańyzdylyǵyn eskere otyryp, Vedomstvoaralyq keńes qurý usynylady. Onda aqshany jylystatý jáne terrorızmdi qarjylandyrý táýekelderin azaıtýǵa baǵyttalǵan sharalar ázirlenetin bolady jáne sharalardy iske asyrý nátıjeleri qaralatyn bolady»,- dedi Álıhan Smaıylov.