Elimizde teri aýrýlaryn emdeýdiń jańartylǵan standarty bekitildi

ASTANA. QazAqparat - Densaýlyq saqtaý mınıstriniń buıryǵymen dermatovenerologııalyq kómek kórsetýdi uıymdastyrýdyń jańartylǵan standarty bekitildi, dep habarlaıdy QazAqparat.

Bul standart Qazaqstanda dermatovenerologııalyq kómekti uıymdastyrýǵa qoıylatyn jalpy qaǵıdattar men talaptardy belgileıdi.

Dermatovenerologııalyq kómek kórsetýdi uıymdastyrý tártibi Halyq densaýlyǵy týraly kodekske sáıkes medıtsınalyq kómektiń sharttaryna, nysandaryna sáıkes baıandalǵan.

Jańalyq retinde úıde, shuǵyl jáne josparly túrde dermatovenerologııalyq kómek kórsetý boıynsha bólimder engizilgen.

Jańa standartta shtat sany, dermatovenerologııalyq kómek kórsetetin densaýlyq saqtaý uıymdaryn jaraqtandyrý kózdelgen.

Teri-venerologııa ortalyǵynyń qurylymy engizildi, sondaı-aq dermatovenerologııalyq aýrýlardy anyqtaý, tirkeý jáne esepke alý tártibi, áıelder men jańa týǵan nárestelerdiń JJBI profılaktıkasy, dıagnostıkalaý, tirkeý erekshelikteri boıynsha taraýlar engizildi.