Elimizde stýdentter men oqýshylar lıgalarynyń sany artady

NUR-SULTAN. QazAqparat – QR Mádenıet jáne sport mınıstri Aqtoty Raıymqulova balalar-jasóspirimder sport klýbtarynyń sany ulǵaıtylatynyn aıtty, dep habarlaıdy QazAqparat tilshisi.

«Sport túrleri boıynsha stýdentter men oqýshylar lıgalarynyń sanyn arttyrý josparlanýda. Búginde atalǵan lıgalar 7 oıyn sport túrleri boıynsha Bilim jáne ǵylym mınıstrliginiń qoldaýymen aýdandyq, qalalyq, oblystyq jáne respýblıkalyq deńgeıde ótkizilýde. Lıgaǵa 1,5 mln oqýshy men stýdent tartý josparlanyp otyr», - dedi mınıstr Ortalyq kommýnıkatsııalar qyzmetindegi onlaın baspasóz máslıhatynda.

Onyń sózine qaraǵanda, elimizde 579 balalar-jasóspirimder klýby jáne 107 balalar-jasóspirimder dene shynyqtyrý klýby jumys isteýde. Osy oraıda balalar-jasóspirimder klýbyn 700-ge deıin, al balalar-jasóspirimder dene shynyqtyrý klýbtary sanyn 340-qa deıin jetkizý josparlanǵan. Bul sharalar sportpen shuǵyldanýshylar sanyn 100 myń adamǵa ulǵaıtady dep josparlanýda.

Sonymen qatar, óńirlerdegi dárigerlik dene shynyqtyrý dıspanserleriniń jumysyn uıymdastyrý kózdelip otyr.

Budan buryn habarlanǵandaı, dene shynyqtyrý muǵalimderi sabaqtan tys sport sabaqtaryn júrgizgeni úshin bazalyq laýazymdyq jalaqydan 100 paıyz mólsherinde qosymsha aqy alýy múmkin.