Elimizde sportpen shuǵyldanatyn erekshe qajettiligi bar adamdar sany kóbeıdi

ASTANA. QazAqparat – Keıingi 3 jylda sportpen jáne dene shynyqtyrýmen aınalysatyn erekshe qajettilikteri bar adamdardyń sany 25,3%-ǵa ósti. Eger 2020 jyly bul kórsetkish 38 352 bolsa, 2023 jyldyń basynda 51 325 adamǵa jetti, dep habarlaıdy QazAqparat Mádenıet jáne sport mınıstrliginiń baspasóz qyzmetine silteme jasap.

Sportpen shuǵyldanatyn erekshe qajettilikteri bar adamdardyń sany boıynsha Qostanaı oblysy kósh basynda. Óńirde erekshe qajettilikteri bar 5687 adam sportpen turaqty túrde aınalysady. Odan keıin Shyǵys Qazaqstan oblysy (4997 adam) jáne Astana qalasy (4514 adam) tur. Úzdik bestikti Túrkistan (4298 adam) jáne Jambyl (4 057 adam) oblystary túıindeıdi.

Aıta ketý kerek, eń qarqyndy ósim elordada: 3 jyl ishinde erekshe qajettilikteri bar sportpen shuǵyldanatyn adamdardyń sany 3 232 adamǵa artty. Ekinshi orynda ShQO (+1585 adam), úshinshi orynda – Qostanaı oblysy (+1295 adam). Jambyl oblysynda 668 adamǵa, Túrkistanda – 659 adamǵa artty.

«Erekshe qajettilikteri bar adamdardyń dene shynyqtyrýmen aınalysýyna jaǵdaı jasamaı, buqaralyq sportty damytý múmkin emes. Qazaqstanda erekshe qajettilikteri bar adamdarǵa arnalǵan 15 sport klýby men 3 mektep, sondaı-aq Almaty oblysynda sportty damytý dırektsııasy jumys isteıdi. Biz sporttyq ınfraqurylymdy qoljetimdi etýge nıettimiz. Sondyqtan qazir elimizdiń barlyq óńirinde 113 jańadan sport nysanyn salý boıynsha jumys júrip jatyr», – dedi Mádenıet jáne sport vıtse-mınıstri Sársen Quranbek.