Elimizde sportpen shuǵyldanatyn adamdardyń sany kúnnen kúnge artyp keledi – Álıhan Smaıylov

ASTANA. QazAqparat – Respýblıkada balalar men jasóspirimderdiń 800-den astam klýby jumys istep jatyr. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Sport pen belsendi ómir salty ult densaýlyǵynyń kepili ǵana emes, sonymen qatar ár adamnyń talanty men qabiletin ashady. Bul óz kezeginde jas urpaqty tárbıeleý úshin óte mańyzdy. Sondyqtan, sport obektileri men keshenderine halyqtyń emin-erkin, esh kedergisiz barýyn qamtamasyz etý qajet. Buqaralyq jáne turaqty sporttyq is-sharalardy uıymdastyrý arqyly azamattardy sportpen shuǵyldanýǵa mindetti túrde tartý qajet. Elimizde jaqsy dástúrge aınalǵan ártúrli jastaǵy adamdarǵa arnalǵan buqaralyq marafondar men jarystar týraly bári biledi», - dedi Á. Smaıylov.

Úkimet basshysy keıingi jyldary barlyq jerde sport alańdary men basqa da iri nysandar salynyp jatqanyn aıtty.

«Biz sportpen shuǵyldanatyn adamdar sany kúnnen kúnge artyp kele jatqanyn kórip otyrmyz. Úılerdiń aýlalarynda, skverlerde jáne saıabaqtarda ornatylǵan trenajerlardy eshkimge qajet emes dep sanaǵan skeptıkter de az bolǵan joq. Jyl saıyn respýblıkada túrli deńgeıdegi 25 myńnan astam sporttyq-buqaralyq is-sharalar ótkiziledi. Olarǵa 1,2 mıllıonnan astam adam qatysady. Aýyldyq jerlerde de buqaralyq sport belsendi damyp keledi.

Respýblıkada balalar men jasóspirimderdiń 800-den astam klýby jumys istep tur. Balalarǵa arnalǵan sport sektsııalarynyń sany artyp keledi», - dedi Premer-Mınıstr.