Elimizde sottalǵan azamattar qandaı kásip túrlerimen aınalysady

NUR-SULTAN. QazAqparat – QR Іshki ister mınıstrligi Qylmystyq atqarý júıesi komıtetiniń tóraǵasy Janat Eshmaǵambetov sottalǵan azamattar qandaı kásip túrlerimen aınalysatynyn aıtyp berdi, dep habarlaıdy QazAqparat tilshisi.

«Sottalǵan azamattardy oqytýmen qatar, biz eńbekke jaramdylarynyń jazasyn óteý barysynda jumyspen qamtylýyna múddelimiz. Jalpy bul máseleler «Eńbek» baǵdarlamasynda qarastyrylǵan. Árıne, bizdiń kásiporyndardyń óndiristik áleýeti aıtarlyqtaı kóp emes, alaıda olar kúrdeli jaǵdaıda kásibin dóńgeletip otyrǵanyn atap ótý kerek. Naryqtyq ekonomıka jaǵdaıynda sottalǵandardyń bárin de eńbekke tartý qıyn, biraq másele ret-retimen sheshilip keledi. Qylmystyq atqarý júıesindegi kásiporyndardyń ónerkásiptik-sharýashylyq áleýetin arttyrý, sol arqyly qosymsha jumys oryndaryn ashý baǵytynda jumystar júrgizilýde», - dedi Janat Eshmaǵambetov IX Azamattyq forým jumysynyń taqyryptyq sessııasynda.

Qazirgi ýaqytta túrmede jazasyn ótep jatqan azamattar metall óńdeý, aǵash óńdeý, qurylys materıaldaryn ázirleý, tigin buıymdary men basqa da taýarlardy óndiretin kásiporyndarda eńbek etip júr.

Qosymsha jumys oryndaryn ashý úshin bul salaǵa shaǵyn jáne orta bıznes te tartylyp jatyr eken.

Máselen kásipkerliktiń 237 sýbektisiniń basqarýyna óndiristik alań berilgen.

Osynyń arqasynda bas bostandyǵynan aıyrý oryndarynda 3 myń jańa jumys orny ashylǵan.

«Búgingi tańda qylmystyq atqarý júıesinde jumysqa jaramdy 14,2 myń azamattyń 11 myńy (77 paıyzy) aılyǵy tólenetin jumyspen qamtylǵan. Odan túsken somaǵa sottalǵandar bostandyqta bireýge keltirgen zalalyn, alımentin nemese aıyppulyn óteıdi. Keıbiri otbasyna kómek kórsetedi. Álbette osy sharalardyń bári de sottalǵan azamattardy qoǵamǵa beıimdeýge septigin tıgizedi», - dep atap ótti ol.