Elimizde shomylýǵa ruqsat berilgen 497 oryn bekitildi
«1 maýsymnan elimizde sýda shomylý kezeńi bastaldy. Sý qoımalarynda qaýipsizdikti qamtamasyz etý maqsatynda Tótenshe jaǵdaılar mınıstrligi quzyrly vedomstvolar jáne ákimdiktermen birlesip keshendi aldyn alý jumystaryn uıymdastyryp, iske asyryp jatyr. Qazirgi kezde elimizde shomylýǵa ruqsat etilgen 497 (2021 jyly - 538) oryn bekitilgen. Onyń ishinde 142-si kommýnaldyq, 341-i jeke jaǵajaı retinde tirkeldi. Munymen qosa, 14 oryn boıynsha naqty ıelerin bekitý jumystary júrgizilip jatyr (ShQO – 10, BQO-4)», - dedi B. Syzdyqov.
Osy oraıda ol elimizde adamdar shomylýǵa nemese demalýǵa baratyn sý qoımalary, ózender men kólderdegi oryndar 50 myńnan asatynyn aıtty. Alaıda bul jerler qaýipsizdik talaptaryna saı jasaqtalmaǵan.
«Halyq eń kóp paıdalanatyn 125 sý qoımasynda Tótenshe jaǵdaılar mınıstrliginiń 493 qutqarýshysy táýlik boıy kezekshilik atqaryp jatyr. Bıyl baqylaýdy kúsheıtý jáne azamattardyń qaýipsizdigin qamtamasyz etý maqsatynda shomylý maýsymy bastalysymen qaýipti jáne kúzetilmeıtin aýmaqtarda Mınıstrliktiń qosymsha 55 jyljymaly qutqarý beketi jumysyn kiristi», - dedi vedomstvo ókili.
Onyń sózine qaraǵanda, zardap shekkenderge alǵashqy medıtsınalyq kómek kórsetý úshin kommýnaldyq jáne jeke jaǵajaılarda 162 medıtsınalyq pýnkt jumys istep jatyr. Qalǵandarynda medıtsına qyzmetkerleri qutqarý pýnktiniń quramynda kezekshilik etedi.