Elimizde sheteldik týrısterdiń jarna tóleý tártibi engizilmek

ASTANA. QazAqparat - Qazaqstan sheteldik azamattardan bir túnge 2-4 dollar mólsherinde «Bed Tax» uqsas týrıstik jarna alý tájirıbesin engizbek. Bul týraly búgin Úkimet otyrysynda QR Mádenıet jáne sport mınıstri Arystanbek Muhamedıuly aıtty, dep habarlaıdy QazAqparat tilshisi.

«Biz Grýzııanyń, Chehııanyń, BAÁ-nyń tájirıbesi boıynsha elderdiń kelý týrızmin damytý úshin negizgi naryqtarda jyljytý sapasyn arttyrýdy usynamyz. Bıýdjettik júktemeni tómendetý úshin kórsetilgen shamada tek sheteldik azamattardan bir túnge 2-4 dollar mólsherinde «Bed Tax» uqsas týrıstik jarna tájirıbesi engiziletin bolady. Shara memlekettik baǵdarlama qabyldanǵan sátten bastap búkil Qazaqstan boıynsha áreket etetin bolady», - dedi «Qazaqstan Respýblıkasynyń týrıstik salasyn damytýdyń 2019-2025 jyldarǵa arnalǵan memlekettik baǵdarlamasy» jobasyn tanystyrǵan Arystanbek Muhamedıuly.

Onyń aıtýynsha, alymdar «Kazakh Tourism» UK AQ janynan ashylǵan bıýdjetten tys shotqa túsedi. Bul keıinnen kompanııanyń ózin-ózi aqtap shyǵýyna jáne eldiń týrızm salasyn ilgerletýge, bıýdjettik júktemeni tómendetýge múmkindik beredi.

«Shara sondaı-aq, «Kazakh Tourism» marketıngtik jumysynyń tıimdiligin yntalandyrady. Sheteldik týrıster aǵynynyń ulǵaıýynan kóbirek alymdar alatyn bolady. Birinshi kezeńderde sharadan túsken qarjylyq túsimder keıinnen ulǵaıyp, jylyna 1,5 mlrd teńgeni quraıdy», - dedi mınıstr.