Elimizde sheteldegi qazaq tildi BAQ-tardyń qaýymdastyǵyn qurý usynyldy
Aıta ketsek, qazirgi ýaqytta shetelderde qazaq tildi buqaralyq aqparat quraldarynan Mońǵolııada «Qazaqnıýs» portaly, «Shuǵyla» jýrnaly, «Jańa dáýir gazeti», Baıan-ólgeı» aımaqtyq radıosy jumys istep tur. Al Iranda «Parstýdeı» aqparattyq agenttiginiń qazaq bólimi men qazaq radıosy habar taratsa, Túrkııada «Qazaq eli» jýrnaly, Reseıde «Omby qazaqtary» men «Aq arna» gazetteri basylyp shyǵady. Sol sekildi, Ózbekstanda «Nurly jol» respýblıkalyq gazeti, «Kenımeh tańy» aýdandyq gazeti, Naýaı teleradıokompanııasy, «Altyn aımaq» baǵdarlamasy bar.
Elordada ótken «Otandastar. Bolashaqqa baǵdar» halyqaralyq dóńgelek ústeliniń «Shet elderde qazaq tilinde jaryq kóretin BAQ-pen baılanys: qazirgi jaǵdaı jáne yntymaqtastyq keleshegi» atty paneldik sessııasyna Aqparat jáne qoǵamdyq damý vıtse-mınıstri Marat Asylhanov, «QazAqparat» HAA bas dırektory Asqar Ýmarov, Otandastar» KEAQ vıtse-prezıdenti Maǵaýııa Sarbasov, Ózbekstan, Mońǵolııa, Reseı, Túrkııa, Iran, Qytaı elderiniń qazaqtildi BAQ ókilderi qatysty.
«Búgingi paneldik sessııaǵa 6 elden 12 BAQ (qazaq tildi) 17 ókil qatysyp otyr. Óz elimiz ben óńirlerimizden de ókilder otyr. Sheteldegi qazaq tildi BAQ-tardyń birigý bastamasy byltyr shyqqan. «Otandastar» qory men Aqparat jáne qoǵamdyq damý mınıstrligi osy bastamany qoldady. Osy rette sheteldegi qazaq tildi BAQ-tardyń qaýymdastyǵyn qurý degen ıdeıany ortaǵa salǵymyz keledi. Bul – óte qajetti jáne zamanǵa saı joba. Álem elderine qarasaq, orys, azerbaıjan, armıan tildi BAQ-tardyń qaýymdastyqtary barshylyq. Túrki tildes halyqtarda da bar. Sondyqtan, bizge de qazaq tildi BAQ-tardyń qaýymdastyǵyn quryp, baılanys ornatýǵa bolady. Bir-birimizge osylaısha kómek-qoldaý bildire alamyz», - dedi Asqar Ýmarov «Otandastar. Bolashaqqa baǵdar» halyqaralyq dóńgelek ústeliniń «Shet elderde qazaq tilinde jaryq kóretin BAQ-pen baılanys: qazirgi jaǵdaı jáne yntymaqtastyq keleshegi» atty paneldik sessııada.
Óz kezeginde «Otandastar» KEAQ vıtse-prezıdenti Maǵaýııa Sarbasov osyndaı bastama kóterip otyrǵan «QazAqparat» Halyqaralyq aqparat agentigine alǵysyn bildirdi.
«Bizge qoldaý kórsetip, qaýymdastyq qurýǵa nıet bildirip otyrǵan «QazAqparat» halyqaralyq aqparat agenttigine alǵys aıtamyz. Pikir almasaıyq. Usynystardyń bárin tyńdaǵymyz keledi. Sheteldegi qandastarymyz qazaq tilinde ótetin baǵdarlamalardy saǵyna kórip, tyńdaıtyndaryn aıtady. Álbette, óte jaqsy bastama», - dedi ol.
Jıyn barysynda sondaı-aq, Qazaqstan men shet elderde qazaq tilinde shyǵatyn BAQ arasynda yqpaldastyq, yntymaqtastyq pen áriptestik baılanys ornatý máseleleri keńinen talqylandy.
Eske sala ketsek, elordada dúnıe júziniń túkpir-túkpirinen kelgen qandastardyń qatysýymen «Otandastar. Bolashaqqa baǵdar» atty halyqaralyq dóńgelek ústel ótip jatyr.