Elimizde shaǵyn kásipkerler sany ósti

ASTANA. QazAqparat - Bıyl qarasha aıynyń basynda elimizde 496,3 myń shaǵyn kásiporyn tirkeldi. Bul ótken jylmen salystyrǵanda 5,4 paıyzǵa kóp, dep habarlaıdy QazAqparat tilshisi.

Finprom.kz portalynyń málimetinshe, atalǵan kompanııalardyń ishinde jumys istep turǵan kásiporyndar 379 myńdy qurap, 2021 jylǵy qazanmen salystyrǵanda 11,4 paıyzǵa ósti. Taratý protsesindegi shaǵyn kásipkerlik sýbektileriniń sany úshinshi jyl qatarynan qysqaryp, 5,2 myń kásiporyndy qurady. Bul bir jyl burynǵydan 3,4 paıyzǵa az.

Bir jylda belsendi shaǵyn kásipkerlik sýbektileriniń sany birden 10,2 paıyzǵa ósip, 2022 jyldyń qazan aıynyń sońynda 181,5 myńǵa jetti. Sonymen qatar olardyń jumys istep turǵan shaǵyn kásiporyndardaǵy úlesi tórtinshi jyl qatarynan azaıyp keledi. Al sońǵy jyly 48,4 paıyzdan 47,9 paıyzǵa deıin tómendedi.

Qazaqstandaǵy belsendi shaǵyn kásipkerlik sýbektileriniń jartysyna jýyǵy úsh oblysta: Almaty (47 myń), Astana (30,9 myń) jáne Qaraǵandy oblysy (9,8 myń). Belsendi shaǵyn kompanııalardyń eń azy jańadan qurylǵan Ulytaý oblysynda: bar bolǵany 1 myń.

Barlyq belsendi shaǵyn bıznes sýbektileriniń tórtten biri derlik saýda jáne avtokólik pen mototsıklderdi jóndeý salasynda jumys isteıdi: 45,2 myń kompanııa — 2021 jyldyń qazan aıymen salystyrǵanda 13,8 paıyzǵa artyq.

Sondaı-aq bilim berý (17,1 myń kásiporyn), qurylys (15,5 myń) jáne kásiptik, ǵylymı jáne tehnıkalyq qyzmet (14,2 myń) salalarynda da kóp.

Ótken jylmen salystyrǵanda aıtarlyqtaı ósim saýda jáne avtojóndeý salasynda baıqaldy. Belsendi shaǵyn kásiporyndar sany 5,5 myńǵa kóbeıdi. Qurylys salasyndaǵy belsendi shaǵyn kásiporyndar sany 287-ge ǵana azaıyp otyr.