Elimizde saılaý barysyn baıqaýshylar jasaryp keledi

ASTANA. QazAqparat – Elimizde saılaý úderisin baıqaýshylar jasaryp keledi. Bul týraly Partııalyq emes baıqaý ortalyǵy Astana qalalyq fılıalynyń tóraǵasy Álııa Áýbákirova aıtty, dep habarlaıdy QazAqparat tilshisi.

«Astana qalasy boıynsha shamamen 2 myń baıqaýshy daıyndaýdy josparlap otyrmyz. Qazirdiń ózinde olardyń úshten birin oqyttyq. Kúndelikti oqytý júrgizilip jatyr.

Bıyl baıqaýshylar qatary jasaryp keledi dep te aıta alamyz. Jastar tarapynan qyzǵýshylyq joǵary. Bul qýantarlyq jaıt. Olarǵa tek ózderiniń quqyqtaryn ǵana oqytyp qoımaı, buǵan deıingi saılaýlarda oryn alǵan jaıttar kezinde qalaı áreket etý qajettigin de túsindiremiz», - dedi ol elordada ótken brıfıng barysynada.

Partııalyq emes baıqaý ortalyǵynyń tóraǵasy Tólegen Kúnádilov bolsa jalpy respýblıka boıynsha baıqaýshylar qatary tolysqan, túrli mamandyq ıeleri ekendigin aıtady.

«Astana boıynsha baıqaýshylardyń ortasha jasy 25-30, al respýblıka boıynsha 40-45 jasty quraıdy. ıAǵnı, respýblıka boıynsha baıqaýshylar tolysqan, túrli mamandyq ıeleri desek bolady. Al jastar jyldan-jylǵa, saılaý ótken saıyn azamattyq ustanymdaryn belsendi bildire bastady. Óıtkeni, álemde, elimizde ne oryn alyp jatqanyn, ózgeristerdi kórip otyr. Olar belsendi azamat bolǵylary keledi», - dedi ol.