Elimizde resmı tirkelgen qansha taksıst bar

ASTANA. QazAqparat – Qarjy mınıstrligi Memlekettik kirister komıtetiniń tóraǵasy Danııar Janálinov salyq salasynda servıstik modeldi damytý baǵytyndaǵy jańa pılottyq jobalarmen tanystyrdy, dep habarlaıdy QazAqparat tilshisi.

«Salyq boıynsha servıstik modeldi damytý baǵytynda 2 pılottyq joba daıyndaldy. Atap aıtqanda, platformalyq jumyspen qamtý boıynsha, joba qazirdiń ózinde iske asyrylyp jatyr. Kelesi elektrondyq saýdaǵa qatysty, ony bıyl 1 shildeden bastap iske qosý josparlanýda. Búginde platformalyq jumyspen qamtý boıynsha salyq organdary, Eńbek jáne halyqty áleýmettik qorǵaý mınıstrligi, Tsıfrlyq damý, ınnovatsııalar jáne aeroǵarysh ónerkásibi mınıstrlikterimen qatar, «ıAndeks» ınternet-platformasymen ıntegratsııalyq jumystar júrgizilýde. Ortaq kelisimge qol qoıyldy», - dedi Danııar Janálinov Ortalyq kommýnıkatsııalar qyzmeti alańynda ótken baspasóz máslıhatynda.

Sonymen qatar komıtet basshysy kásipkerlik qyzmettiń resmı túrde tirkelýi kerektigin eske saldy.

«Mysaly, taksı júrgizýshisi jeke kásipker tirkelýi nemese taksopark shtatynda bolýy kerek. Eger tólem somalaryn salystyryp qarasaq, olarǵa jeke kásipker retinde tirkelgeni tıimdirek. Búginde taksı júrgizýshileriniń deni zańnan tys jumys isteıdi. Taksı qyzmeti boıynsha elimizde 16 811 jeke kásipker tirkelgen. Resmı tirkelmegen taksısterdiń áleýmettik turǵydan qorǵalmaǵanyn umytpaǵan jón», - deıdi ol.

Onyń aıtýynsha, qarjylyq saýatsyzdyq jáne azamattardyń kásipker retinde tirkelýdegi qorqynyshy salyq mindettemelerin oryndaýda kedergi keltiredi.