Elimizde PTR testileý baǵasyn tómendetý máselesi úsh kún ishinde sheshiledi
Búgin QR Premer-Mınıstriniń orynbasary Eraly Toǵjanovtyń tóraǵalyǵymen ótken Vedomstvoaralyq komıssııanyń otyrysynda Memleket basshysy Q. Toqaevtyń koronavırýs pandemııasynyń ekinshi tolqynyna daıyndyq máseleleri jónindegi 7 qazandaǵy keńeste bergen tapsyrmalaryn oryndaý boıynsha naqty sharalar ázirlendi.
Jıynda Eraly Toǵjanov jaýapty memlekettik organdarǵa bıznes-qoǵamdastyqpen, salalyq qaýymdastyqtarmen birlesip, halyqqa qyzmettiń qoljetimdiligin arttyrý úshin úsh kúndik merzimde PTR testileý baǵasyn tómendetý máselesin pysyqtap, Vedomstvoaralyq komıssııanyń kelesi otyrysyna kelisilgen usynystardy shyǵarýdy tapsyrdy.
Sonymen qatar, Premer-Mınıstrdiń orynbasary bir apta merzimde óńirlerde PTR testileýdi birkelki ótkizýdi qamtamasyz etýdi, karantındik rejımdi buzýshylyqtardy, onyń ishinde QR memlekettik shekarasy arqyly ótkizý pýnktterinde, áýejaılarda, temirjol vokzaldarynda anyqtaý boıynsha monıtorıng toptarynyń jumysynyń tıimdiligin arttyrýdy tapsyrdy.
Eske sala keteıik, keshe Memleket basshysy Qasym-Jomart Toqaev koronavırýsqa qatysty testileý kólemin arttyryp, baǵasyn qoljetimdi etýdi tapsyrǵan edi.
Memleket basshysynyń aıtýynsha, zerthana jelisi keńeıtilip, barsha álemde testileý quny tómendegenine qaramastan, elimizde testileý baǵasy áli de joǵary bolyp tur. Bul turǵyda baǵa 10-nan 18 myń teńgege deıin jetedi.
«Halyqtyń basym bóligine bul soma tıimsiz bolyp tur dep sanaımyn. Úkimet pen ákimderden testileýdiń qarjylyq máselesin sheshý talap etiledi», - dedi Qasym-Jomart Toqaev.