Elimizde problemaly alımentter máselesi qalaı sheshilip jatqany aıtyldy
16:15, 19 Maýsym 2020
NUR-SULTAN. QazAqparat – Ádilet mınıstrligi Strategııalyq josparlaý departamentiniń dırektory Berik Berkimbaev problemaly alımentter máselesi qalaı sheshilip jatqanyn aıtty, dep habarlaıdy QazAqparat tilshisi.
«Búginde elimizde sot oryndaýshylarynyń qaraýynda 210 myń alımenttik is bolsa, sonyń 5 paıyzǵa jýyǵy problemaly alıment retinde tirkeldi. 2019 jyly bul kórsetkish 18 myńǵa jýyq bolǵan. Byltyr jergilikti atqarý organdarymen birlesip memorandým jasap, osy baǵytta 7-8 aıda problemaly alımentter sanyn 6,5 myńǵa tómendettik», - dedi Berik Berkimbaev Ortalyq kommýnıkatsııalar qyzmetinde.
Onyń sózine qaraǵanda, jergilikti atqarý organdary jumys oryndaryn usyný sharalaryn uıymdastyrdy.
«Osynyń nátıjesinde, 2,2 myńǵa jýyq jumyssyz bereshegi bar adam jumysqa turdy. Odan basqa, aqshasyn tólemeı júrgen 500-ge tarta adamnyń kóligi aıypturaqqa qoıyldy. Osy baǵyttaǵy jumystardyń arqasynda alıment boıynsha biraz qarjy tólendi», - dedi B. Berkimbaev.