Elimizde ózin-ózi jumyspen qamtyǵan halyq sany 2,7 mln. adamdy qurap otyr
El Prezıdenti N. Nazarbaev Joldaýynda ózin-ózi jumyspen qamtyǵan halyqty ekonomıkamyzdyń eń mańyzdy kadrlyq rezervi retinde ataǵan bolatyn. «Bul rasynda da erekshe máni artyp otyrǵan sala, óıtkeni, búgingi kúni elimiz úshin qajetti baǵdarlama qabyldandy. Endi solardy júzege asyrý arqyly ózin-ózi jumyspen qamtyǵandardyń problemalaryn sheshýge úmit zor. Máselen, ındýstrııalyq-ınnovatsııalyq damý baǵdarlamasyn alyp qarasaq, 2014 jylǵa deıin 294 ınvestıtsııalyq joba júzege aspaq. Al osy turǵydan Elbasy eldegi ındýstrııalandyrýǵa árbir qazaqstandyqty tartý týraly másele qoıǵan edi. Osy rette ózin-ózi eńbekpen qamtyp júrgen azamattar máselesin qalaı sheshemiz, degen problemany tereńirek talqylaǵan oryndy», - dep atap ótti jıyndy ashyp sóz sóılegen Áleýmettik keńes tóraıymy, depýtat Aıtkúl Samaqova. Onyń aıtýynsha, ındýstrııalandyrýdyń memlekettik baǵdarlamasy barysynda 161 myń turaqty jumys ornyn jáne qurylys kezeńinde 207 myń jumys ornyn quratyn jalpy somasy 8,1 trıllıon teńgeni quraıtyn jobalar iske aspaq.
Sonymen qatar, depýtat A. Samaqova údemeli ındýstrııalyq-ınnovatsııalyq damý baǵdarlamasy úshin kadrlarǵa suranys 108 myń adamdy quraıtynyn atap ótti, bul rette atap aıtqanda tehnıkalyq mamandar asa qajet. Máselen, tereń burǵylaý ınjenerleri, munaı men gaz operatorlary, geofızıkter, energetıkterge, jerasty qubyrlary sheberleri sekildi joǵary jáne arnaıy biliktiligi bar mamandar suranysqa ıe. «Údemeli ındýstrııalyq-ınnovatsııalyq damý baǵdarlamasyn júzege asyrýdyń ekinshi jylyna ótip otyrmyz. Áıtse de, osy baǵyttaǵy kadrlyq qamtamasyz etý áli de ózektiligin joımaǵan, kún tártibindegi másele. Al statıstıkalyq málimetterge súıensek, elimizde ózin-ózi jumyspen qamtyǵan halyqtyń sany 2,7 mln. adamdy qurap otyr. Budan bólek, 2010-2014 jyldary ekonomıkanyń kadrlarǵa jalpy suranysy 287 myń adamdy quraıtyn bolady», - dedi A. Samaqova.