Elimizde otbasyn qoldaý ortalyqtary tujyrymdamasy ázirlenýde

ASTANA. QazAqparat – Otbasyn qoldaý ortalyqtary qyzmetiniń tujyrymdamasy ázirlenip jatyr. Bul týraly Májilis depýtattarynyń saýalyna QR Premer-Mınıstriniń orynbasary – Qarjy mınıstri Erulan Jamaýbaevtyń jaýabynda aıtylǵan, dep habarlaıdy QazAqparat tilshisi.

«Úkimet jergilikti atqarýshy organdarmen ómirlik qıyn jaǵdaıǵa tap bolǵan otbasylarǵa qoldaý kórsetý, balaly áıelderdi ýaqytsha baspanamen qamtamasyz etý ortalyqtaryn qurý jónindegi qyzmetti úılestirý boıynsha josparly jumys júrgizýde. Bul rette, Prezıdent janyndaǵy Áıelder isteri jáne otbasylyq demografııalyq saıasat jónindegi ulttyq komıssııanyń tapsyrmasy boıynsha Otbasyn qoldaý ortalyqtary qyzmetiniń tujyrymdamasy ázirlenýde. Atalǵan tujyrymdama otbasyn qoldaý ortalyqtarynyń fýnktsııalaryn, qyzmet kórsetý kezinde olardyń memlekettik organdarmen jáne basqa da uıymdarmen ózara is-qımyl algorıtmderin qamtıdy», - dedi Erulan Jamaýbaev.

Onyń atap ótýinshe, Parlament Májilisiniń qaraýyndaǵy «Qazaqstan Respýblıkasynyń keıbir zańnamalyq aktilerine otbasy ınstıtýtyn nyǵaıtý máseleleri boıynsha ózgerister men tolyqtyrýlar engizý týraly» Zań jobasynda otbasylardy qoldaý ortalyqtaryn qurý jáne (nemese) olardyń qyzmetin uıymdastyrýdy jergilikti atqarýshy organdardyń quzyretine berý qarastyrylǵan.

«Budan bólek, Prezıdenttiń 2022 jylǵy 1 sáýirdegi №853 Jarlyǵymen Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasyna engizilgen ózgeristerge sáıkes jergilikti bıýdjet qarajaty esebinen árbir qalada jáne aýdanda jergilikti atqarýshy organdardyń otbasyn qoldaý ortalyqtaryn qurýy kózdelgen. Osylaısha, otbasylardy qoldaý ortalyqtaryn qurý tıisti jergilikti qarajat esebinen bıýdjettik zańnamaǵa sáıkes júrgiziletin bolady», - dedi ol.

Foto: chicagoildivorcelawyer.com