Elimizde otandyq óndirýshilerge arnalǵan elektrondy saýda alańy ashylady

ALMATY. QazAqparat - Qazaqstanda otandyq óndirýshilerge arnalǵan elektrondy saýda alańy ashylady. Osylaısha, otandyq kompanııalarǵa ózderi shyǵarǵan taýarlardy ǵalamtor arqyly satýǵa múmkindik beriledi. Bul týraly búgin Almatyda Qazaqstannyń jeńil ónerkásibi salasyna arnalǵan forým barysynda QR jeńil ónerkásibi kásiporyndary Qaýymdastyǵynyń prezıdenti Lıýbov Hýdova málim etti.

«Qaýymdastyq qazir elektrondy saýda alańyn ázirlep, otandyq óndirýshilerge arnap shyǵaryp jatyr. Satylymdardyń kem degende 65 paıyzy osy elektrondy formatta júzege asyrylatyn bolady. Bul keleshegi bar baǵyt. Sondyqtan, biz ony damytqymyz keledi. Sonymen qatar, biz qaýymdastyq janynan ashylatyn elektrondy alańda otandyq óndirýshilerdiń taýarlaryn usynǵymyz keledi. Biz jaqyn bolashaqta onyń tanystyrylymyn ótkizetin bolamyz», - dedi ol.

Budan basqa, L. Hýdova 2015 jyly otandyq jeńil ónerkásip kásiporyndary jalpy somasy 70 mlrd teńge bolatyn ónim shyǵarǵandyǵyn aıtty. Sáıkesinshe, ótken jyly óndiris kólemi 3,5 paıyzǵa artqan. Mamandardyń pikirinshe, bıyl da bul salada ósim baıqalady. Buǵan osy salaǵa memleket tarapynan laıyqty qoldaý kórsetilip, taýarlardyń belsendi túrde eksportqa shyǵarylyp jatqandyǵy arqasynda qol jetkizilgen.

«Bul otandyq kompanııalardyń áleýetin arttyrýǵa jáne olardyń basqa da naryqtarǵa shyǵýyna múmkindik beredi», - deıdi mamandar.