Elimizde osal topqa jatatyn áıelderdi qoldaý ortalyǵyn ashý usynyldy
«Bizdiń qoǵamdyq qor áleýmettik osal topqa jatatyn áıelderdi qoldaýǵa arnalǵan. Jumys istep jatqanymyzǵa 1,5 jyl boldy. Osy ýaqyt ishinde 230 atalǵan topqa jatatyn elordalyq áıel kásipkerlikke baýlý kýrsynan ótti. Atap aıtqanda, kompıýterlik saýattylyq, kopıraıter, SMM, sheshendik óner jáne taǵy basqa. Olar bir aıy boıy oqyp, nátıjesinde sertıfıkat alyp shyǵady. Bizde oqyǵan áıelderdiń ishinde jalǵysbasty, múgedek bala baǵyp otyrǵan, kópbalaly jáne az qamtylǵan otbasy áıelderi bar», - dedi «MamaPro» osal topqa jatatyn áıelderdi qoldaýǵa arnalǵan qoǵamdyq qor basshysy Ásııa Tıkeeva otyrysta jasaǵan baıandamasynda.
Onyń aıtýynsha, osal topqa jatatyn áıelderdi qoldaý ortalyqtaryn elimizdiń barlyq óńirinde ashý qajet.
«Biz bir kúnde áıelderdiń basyn qosyp, kásipkerlikke oqytýdy bastaǵan joqpyz. Ol úshin arnaıy baǵdarlama jasaldy. Bizdiń ortalyqqa túrli sebeptermen jumys isteı almaı júrgen nemese óz kásibin dóńgeletkisi keletin, biraq múmkindikteri joq áıelder keledi. Qor jumysy búginde óz nátıjesin berip jatyr. Bir jyldyń ishinde 200-den astam áıel bilim alyp, onyń 30-y óz isin ashyp, 20 adamdy jumyspen qamtydy. Degenmen osy ýaqyt ishinde baıqaǵanymyz bizge kelgen áıelder kásipti úırenýden bólek, psıhologııalyq qoldaýdy qajet etedi. Kóptegen áıelder túrli ómirlik nemese otbasylyq jaǵdaıǵa baılanysty maqsat-murattarynan aırylǵan, sebebi olardyń muńy basqa. Osy turǵyda memleket tarapynan biz sekildi úkimettik emes uıymdardy qoldap, elimizdiń barlyq qalalarynda atalǵan sanatqa jatatyn áıelderdi qoldaý ortalyǵyn qurýdy usynǵym keledi. Búginde Nur-Sultan qalasynan bólek, bizdiń qor Almatyda jumys istep jatyr. Onda qazirgi kúni 20 áıel kásipkerlik boıynsha bilim alýda», - dedi ol.
Aıta keteıik, elordada «Memleket basshysynyń Joldaýyn júzege asyrýdaǵy Úkimettik emes uıymdardyń rólin arttyrý» atty sarapshylar qaýymdastyǵynyń dıalogtyq otyrysy ótip jatyr. Atalǵan otyrysta azamattyq qoǵamdy damytýdyń 2025 jylǵa deıingi tujyrymdamasy qabyldanatyny aıtyldy.