Elimizde órt sóndirýge arnalǵan neshe tikushaq bar

ASTANA. QazAqparat – Tótenshe jaǵdaılar birinshi vıtse-mınıstri Ibragım Kúlshimbaev órtti óshirýge arnalǵan áýe tehnıkasy jaıynda túsinik berdi, dep habarlaıdy QazAqparat tilshisi.

Búgin Senattyń jalpy otyrysynan keıin tilshiler vıtse-mınıstrden órtti sóndirýge arnalǵan áýe tehnıkasy jaıynda suraq qoıdy.

«Bizde tek 33 tikushaq bar. Sonyń arasynda sý shashyp, órt sóndiretin 16 tikushaq jasaqtalǵan. Qalǵandary izdestirý jumystaryna, barlaý jumystaryna arnalǵan», - dedi Ibragım Kúlshimbaev.

Onyń aıtýynsha, bir mezgilde barlyq tikushaqty paıdalaný múmkin bolmaıdy. Óıtkeni keıbiri josparly nemese reglamenttik jóndeýge kirgiziledi.

«Sondyqtan olardyń teń jartysy jóndeýde bolady. Bizde ushaqtar joq. Bul áýe kóligine aqsha suradyq, alaıda qarajat qarastyrylmady. Sondyqtan ushaq satyp alǵan joqpyz», - dedi vıtse-mınıstr.

Aıta keteıik, Ibragım Kúlshimbaev 4-5 kúnde Abaı oblysyndaǵy orman órti tolyqtaı óshirilýi múmkin ekenin aıtty.

Budan buryn habarlanǵandaı, 14 maýsymda saǵat 21:00-de áýeden barlaý jáne jedel jaǵdaıdy baǵalaý qorytyndysy boıynsha TJ vıtse-mınıstri general-maıor Marat Kúldikov Abaı oblysyndaǵy Semeı ormany tabıǵı rezervatynyń aýmaǵyndaǵy tabıǵı órttiń oqshaýlanǵanyn jarııalady.