Elimizde oppozıtsııalyq basylymdar erkin taralady - T. Ábishev

ASTANA. 26 qarasha. QazAqparat /Marlan Jıembaı/ - Elimizde oppozıtsııalyq basylymdar erkin taralady. Búgin elordada ótip jatqan EQYU Sammıti qarsańyndaǵy Sholý konferentsııasynyń Úkimettik emes uıymdary forýmynda sóz alǵan QR Prezıdenti janyndaǵy Adam quqyǵy jónindegi komıssııanyń hatshysy Tastemir Ábishev osyndaı pikir bildirdi.

Onyń atap ótýinshe, QR Konstıtýtsııasynyń 98 babynyń 30-y, ıaǵnı 30 paıyzdan astamy adam quqyǵy men bostandyǵyna arnalǵan. QR-nyń qoldanystaǵy Konstıtýtsııasy, qoldanystaǵy zańy sóz bostandyǵyna, buqaralyq aqparat quraldaryn erkin damytýǵa kepildik beredi. Degenmen, Konstıtýtsııaǵa jáne zańǵa sáıkes tsenzýraǵa shekteý qoıylǵan.

Sondaı-aq ol óziniń aldynda sóz alǵan áriptesiniń oppozıtsııalyq basylymdardyń erkin taratylýyna bılik tarapynan qysym bar degen pikirimen kelispeıtindigin bildire kelip: «Vzglıad», «Respýblıka», «Alǵa», «Svoboda slova» syndy basylymdar Qazaqstan aýmaǵyndaǵy kez kelgen dúńgirshekte erkin taralady.Buqaralyq aqparat quraldarynyń 85 paıyzǵa jýyǵy memlekettik emes basylymdar. 35 gazet 11 tilde,Qazaqstan etnostarynyń tilinde jaryq kóredi», - dedi.

Sóziniń sońynda ol Adam quqyǵy salasyndaǵy ulttyq josparǵa sáıkes, sondaı-aq azamattardyń aqparat alý quqyǵyn qamtamasyz etý maqsatynda Parlament Májilisiniń depýtattary jarııa aqparatqa qol jetkizý týraly zań jobasyn ázirlegendigin atap ótti.