Elimizde óndirilgen farmatsevtıkalyq preparattardyń jartysyna jýyǵy OQO úlesinde - B.Atamqulov

ShYMKENT. QazAqparat - Respýblıka boıynsha óndirilip jatqan farmatsevtıkalyq preparattardyń jartysyna jýyǵy ońtústik óńirdiń úlesine tıesili. Bul týraly búgin OQO Aımaqtyq kommýnıkatsııalar qyzmetinde ótken brıfıngte Ult josparynyń oryndalý barysy týraly baıandaǵan óńir basshysy B.Atamqulov málim etti.

Oblys ákiminiń aıtýynsha, Ońtústik Qazaqstanda farmatsevtıka klasteri qalyptasýda, dep habarlaıdy ortcom.kz saıty.

«Indýstrııalandyrý kartasy sheńberinde farmatsevtıka salasynda 6 joba júzege asyryldy. «Hımfarm» AQ-ynda jalpy quny 100 mln dollar 4 kezeńnen turatyn joba júzege asyrylýda. Búginde birinshi kezeńi iske qosylyp, nátıjesinde 500 jumys orny ashyldy. Al bıyl quny 10,5 mln dollarlyq untaqty antıbıotıkterdi óndirý tsehynyń qurylysy aıaqtalady dep josparlanýda», - dedi oblys basshysy.

Budan bólek, tabletkalar óndirisi jáne qan jınaıtyn konteıner óndiretin 2 zaýyttyń qurylysy bastaldy, ortopedııalyq buıymdar shyǵaratyn zaýytty iske qosý jumystary aıaqtalýda.

Aıta keteıik, Ońtústik Qazaqstan memlekettik farmatsevtıka akademııasy - farmatsevtıkalyq beıindegi mamandarmen naryqty qamtamasyz etetin Qazaqstandaǵy jalǵyz farmatsevtıkalyq joǵarǵy oqý orny.