Elimizde óńdelgen taýarlar eksporty 37,5% ulǵaıǵan

ASTANA. QazAqparat – Qańtar-qyrkúıek aralyǵynda eldegi óńdelgen taýarlar eksporty 37,5% ulǵaıǵan. Bul týraly Ulttyq ekonomıka mınıstri Álibek Qýantyrov málim etti, dep habarlaıdy QazAqparat tilshisi.

«Óńirler arasynda eń joǵarǵy ósim Qyzylorda, Shyǵys Qazaqstan jáne Batys Qazaqstan oblystarynda, sondaı-aq Almaty jáne Shymkent qalalarynda baıqaldy.

Aǵymdaǵy jylǵy qańtar-qyrkúıekte syrtqy saýda taýar aınalymy 35% ósip, 98,4 mlrd AQSh dollaryn qurady. Onyń ishinde eksport boıynsha kórsetkish 47,5% ósip, 63,8 mlrd AQSh dollaryna deıin jetti. Bul rette óńdelgen taýarlar eksporty 37,5%-ke ulǵaıyp, 19,3 mlrd AQSh dollaryn qurady»,-dedi vedomstvo basshysy.

Sondaı-aq ol taýarlar ımporty 34,6 mlrd dollarǵa jetkenin atap ótti.

«Jalpy oń saýda balansy 29,3 mlrd AQSh dollaryn qurady. Óńdeý ónerkásibinde oń ósim saqtalyp keledi. Osy jylǵy qańtar-qazandaǵy óndiris kólemi 4,3% ósti. Kórsetkish ósimi 16 óńirde tirkeldi. Sonyń ishinde Jambyl, Qostanaı, Shyǵys Qazaqstan oblystary jáne Almaty qalasy eń joǵarǵy ósimdi kórsetti», -dedi mınıstr.