Elimizde omyrtqasynyń aýyr patologııasy bar 3 jasar balaǵa biregeı operatsııa jasaldy

ASTANA. QazAqparat – Qazaqtandyq medıtsına mamandary reseılik áriptesterimen birge omyrtqasynyń aýyr patologııasy bar 3 jasar ul balaǵa biregeı operatsııa jasady, dep habarlaıdy QazAqparat QR Densaýlyq saqtaý mınıstrligniń baspasóz qyzmetine silteme jasap.

QR Densaýlyq saqtaý mınıstri Ajar Ǵınııat G. I. Týrner atyndaǵy Ǵylymı-medıtsınalyq zertteý ortalyǵynyń Balalar travmatologııasy jáne ortopedııasy ulttyq medıtsınalyq zertteý ortalyǵynyń dırektory Sergeı Vıssarıonovpen, Akademık N.J. Batpenov atyndaǵy Ulttyq travmatologııa jáne ortopedııa ǵylymı ortalyǵy dırektorynyń mindetin atqarýshy Arman Batpenmen jáne bas shtattan tys balalar travmatology Bolat Naǵmanovpen kezdesý ótkizdi.

Kezdesýdiń basty máselesi Reseıden kelgen áriptesterdiń Qazaqstan Respýblıkasynyń medıtsınalyq ortalyqtarymen tyǵyz yntymaqtastyǵy, sondaı-aq eldegi balalar travmatologııasy men ortopedııasy baǵytyn belsendi damytý boldy.

Mınıstrmen kezdesýden keıin Astanadaǵy Ulttyq travmatologııa jáne ortopedııa ǵylymı ortalyǵynyń bazasynda Sergeı Vıssarıonov «Omyrtqanyń aýrýlary men zaqymdanýyn emdeýdiń zamanaýı hırýrgııalyq tehnologııalary» taqyrybynda semınar ótkizdi.

Foto: QR Densaýlyq saqtaý mınıstrligniń baspasóz qyzmeti

28 sáýirde Sergeı Vıssarıonov Akademık N. J. Batpenov atyndaǵy UTOǴO dárigerlerimen birlesip skolıozdyń týa bitken aýyr túrimen 3 jasar balaǵa operatsııa jasady.
Operatsııa barysynda ǵalymdardyń eń jańa ázirlemesi - balanyń tolyq damýyna kedergi keltirip qana qoımaıtyn jáne syrtqy aqaýlardy týdyratyn, sondaı-aq bundaı jaǵdaıda hırýrgııa keshiktirilse, aýyr múgedektikke ákelýi múmkin patologııanyń aýyr túrin túzetý úshin tıtan metall konstrýktsııasy paıdalanylady.

Otandyq óndiristiń metall konstrýktsııasy erte shaqtaǵy patsıentterde omyrtqanyń deformatsııasyn túzetýge arnalǵan. Operatsııadan keıin shamamen 2 jyl ótken soń, metall konstrýktsııany alyp tastaýǵa bolady jáne bala tolyqqandy belsendi ómir súre alady.

Qazaqstannyń barlyq tilek bildirgen ortoped-travmatologtary úshin operatsııanyń translıatsııasy ZOOM kómegimen onlaın rejımde ótedi.

«10 jyl boıy G. I. Týrner atyndaǵy ǴMZO men jáne Akademık N.J. Batpenov atyndaǵy UTOǴO tyǵyz yntymaqtastyq ornatýda. Ótken jyly tamyz aıynda ortalyqtardyń arasynda eki mekemeniń bazasynda bilim berý protsesin uıymdastyrý, tájirıbe almasý, medıtsınalyq bilim berý salasynda ǵylymı zertteýler men taldamalyq zertteýlerdi birlesip júrgizý, emdeýdiń jańa hırýrgııalyq ádisteri men ınnovatsııalyq tehnologııalardy ázirleý salasyndaǵy ózara yntymaqtastyqty jandandyrý kózdeletin shartqa qol qoıyldy»,-delingen habarlamada.