Elimizde múlikti rásimdeý derekteri sheneýnikterdi deklaratsııalaý aıasynda tekseriledi

ASTANA. QazAqparat – Qarjy mınıstri Erulan Jamaýbaev sheneýnikterdiń deklaratsııalary qoǵamǵa nelikten qoljetimdi emestigin túsindirdi, dep habarlaıdy QazAqparat tilshisi.

«2025 jylǵa deıin eshqandaı aıyppul is-sharalary qoldanylmaıdy. 2025 jyly jalpyǵa ortaq deklaratsııalaý protsesin aıaqtaımyz. Bul memlekettik qyzmetshilerge qatysty. Sol kezde bári jarııalanatyn bolady. Óz múlkin deklaratsııalamaıtyn ne salyq tólemeıtinderge tıisti is-shara qoldanylady», - dedi Erulan Jamaýbaev Úkimet otyrysynan keıin BAQ ókilderiniń saýalyna oraı.

Onyń atap ótýinshe, bul jumys memlekettik qyzmetshilerge de, kásipkerlerge de qatysty birdeı júrgiziledi.

«Bizde jalpyǵa ortaq deklaratsııalaý birneshe kezeńge bólinedi. Sońǵysy – 2025 jyly bolady. Biz sol durys bolady dep sheshtik. Óıtkeni, memlekettik qyzmetshilerdiń týystary bar. Qandaı da bir múlik durys rásimdelmegen shyǵar. Munyń bárin 2025 jyly anyqtaımyz. Jalpy jaǵdaı belgili bolady. Kimde qandaı múlik jazylǵanyn bilemiz», - dedi mınıstr.

Sonymen qatar, Erulan Jamaýbaev óziniń deklaratsııasyn jarııalaýǵa qatysty saýalǵa jaýap berip, ony kadr qyzmetine usynǵanyn jáne olar jarııalaýy tıistigin aıtty.