Elimizde múgedektigi bar adamdar jumys isteı alatyn kásipter atlasy jasalady
Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda Birjan Nurymbetov múgedektigi bar adamdarǵa qoldaý kórsetý mınıstrlik jumysynyń eń basty degen basymdyqtarynyń biri bolyp tabylatyndyǵyn atap ótti. Máselen, erekshe qajettilikteri bar adamdardy áleýmettik qoldaýdy kúsheıtý jáne olardy qoǵam ómirine tartý maqsatynda 19 normatıvtik-quqyqtyq aktige ózgerister engizilgen. Buǵan qosa 2020 jyly Áleýmettik qyzmetter portaly iske qosyldy. Onyń kómegimen múmkindigi shekteýli adamdar ónim jetkizýshilerden tehnıkalyq qalpyna keltirý quraldaryna jáne arnaýly áleýmettik qyzmetterge tikeleı tapsyrys bere alady. Portalda qazirdiń ózinde tehnıkalyq qalpyna keltirý quralynyń 24 túri ornalastyrylǵan. Al portaldyń tolyq iske qosylýy 2021 jylǵa josparlanyp otyr. Budan basqa emdeý-shıpajaılyq em alý merzimi de retteledi. Múgedekterdiń ótinishi boıynsha jeke kómekshilerge aqy tóleýdiń biryńǵaı tártibi belgilendi. Eresekterge 5 jylǵa múgedektik belgilenetin aýrýlardyń tizbesi bekitildi. Medıtsınalyq-áleýmettik saraptamany syrttaı júrgizýge kezeń-kezeńimen kóshý josparlanýda.
«Múgedektigi bar adamdardy áleýmettik qoldaýdy qarjylandyrý 10 paıyzǵa ósti jáne 2019 jylǵy 315 mlrd teńgemen salystyrǵanda, 2020 jyly 347 mlrd teńgeni qurady. Tehnıkalyq qalpyna keltirý quraldarymen jáne arnaýly áleýmettik qyzmettermen qamtamasyz etýdi qarjylandyrý 17 paıyzǵa artyp, 2019 101 mlrd teńgege jetti», – dedi ol.
Sondaı-aq, mınıstr aldaǵy jyldary múgedektigi bar adamdardyń ekonomıkalyq belsendiligi úshin múmkindikter jasaý negizgi basymdyq retinde belgilengenin aıtty.
«Búginde Qazaqstanda eńbekke qabiletti múgedektigi bar adamdardyń jalpy sanynyń tórtten bir bóligi ǵana eńbek qyzmetimen aınalysady. EYDU elderinde bul kórsetkish 40 paıyzǵa jetedi. Kelesi eki jyl ishinde aldymyzǵa múgedektigi bar adamdardyń jumyspen qamtylýyn 30 paıyzǵa jetkizý mindetin qoıdyq. Ol úshin qosymsha 20 myń adamdy jumyspen qamtý qajet. Múgedektigi bar adamdarmen, úkimettik emes uıymdarmen jáne jumys berýshilermen birge múgedekterdi ekonomıkalyq qyzmetke tartýǵa kedergi bolatyn negizgi túıtkilderdi jáne olardy sheshý joldaryn anyqtadyq», – dedi mınıstr.
Onyń atap ótýinshe, múgedektigi bar adamdardy belsendi eńbekke tartý úshin olardyń quzyreti týraly derekqor qurý jáne múgedektigi bar adamdar jumys isteı alatyn kásipterdiń atlasyn jasaý josparlanýda. Múgedektigi bar adamdardy jumyspen qamtýǵa járdemdesýdiń belsendi sharalaryna tartý úshin jumyspen qamtý ortalyqtarynyń qyzmetkerlerin medıtsınalyq-áleýmettik saraptama oryndaryna jiberý kózdelýde. Onyń negizgi tetigi «Eńbek» memlekettik baǵdarlamasy bolady. Sonymen birge «TenQogam» áleýmettik qoldaý ortalyqtary qurý josparlanǵan. Onda bıznes jobalardy damytýǵa kómek kórsetiledi jáne kásiptik bilim beriledi.
«Barlyq óńirlerde ońaltý ortalyqtary jumys jasap, múgedektigi bar 18 jastan asqan adamdardy kásiptik beıimdeý jáne saýyqtyrýmen aınalysatyn bolady. 2020 jyldan bastap 2023 jylǵa deıingi kezeńde 8 óńirde jańa ońaltý ortalyqtaryn salý josparlanýda. Jergilikti atqarýshy organdar múgedektigi bar adamdarǵa kedergisiz orta jasaý jumystaryn jalǵastyrady», – dedi Birjan Nurymbetov.
Mınıstr múgedektigi bar adamdardy áleýmettik qoldaýdy kúsheıtý maqsatynda zańnamany odan ári jetildirý qarastyrylǵanyn basa aıtty.
«Bizdiń mınıstrlik ázirleıtin «Múgedekterdi áleýmettik qorǵaý týraly» jańa zań jobasynyń negizgi baǵyttary: múgedektigi bar adamdardyń ekonomıkalyq belsendiligin arttyrý jónindegi sharalardy kúsheıtý jáne olardy áleýmettik qorǵaýdyń qosymsha sharalaryn engizý», – dedi ol.