Elimizde múgedektigi bar adamdar sany 700 myńnan asty

ASTANA. QazAqparat – Búgin Májilistiń jalpy otyrysynda «Múgedekterdiń quqyqtary týraly konventsııaǵa Fakýltatıvtik hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Zańnyń maqsaty – Múgedekterdiń quqyqtary týraly konventsııaǵa 2006 jylǵy 13 jeltoqsanda BUU-nyń Bas Assambleıasy qabyldaǵan Fakýltatıvtik hattamany ratıfıkatsııalaý.

«Búginde elimizde múgedektigi bar azamattar sany 700 myńnan asty. Onyń 59 paıyzy eńbekke qabiletti jastaǵy azamattar, 14,7% balalar. Bul sanattaǵy azamattarymyzdyń ómir súrý sapasyn jaqsartý – Úkimettiń kún tártibindegi mańyzdy máselelerdiń biri», – dedi Eńbek jáne halyqty áleýmettik qorǵaý mınıstri Tamara Dúısenova.

Qazaqstan «Múgedekterdiń quqyqtary týraly» konventsııaǵa jáne oǵan qatysty Fakýltatıvtik hattamaǵa 2008 jylǵy jeltoqsanda qol qoıyp, 2015 jyly Konventsııany ratıfıkatsııalaǵany belgili. Osy oraıda Qazaqstan halyqaralyq standarttarǵa sáıkes múgedektigi bar azamattardyń quqyqtaryn qorǵaýdy qamtamasyz etýge mindetteme aldy.

Mınıstrdiń aıtýynsha, osy jyldar ishinde osy sanattaǵy azamattardyń quqyqtaryna qatysty zańdarǵa ózgerister engizildi, 2025 jylǵa deıin múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi Ulttyq jospar qabyldandy. Búgingi kúni ony iske asyrýdyń 1-shi kezeńi aıaqtalyp, 2019 jyldan bastap 2-shi kezeńniń is-sharalary júzege asyrylyp jatyr.

«Qazaqstannyń ózine alǵan halyqaralyq mindettemelerin jáne atqarylǵan sharalardy eskere otyryp, Memleket basshysy 2020 jylǵy 22 qazanda ótken Ulttyq qoǵamdyq senim keńesiniń otyrysynda Múgedekterdiń quqyqtary týraly konventsııaǵa Fakýltatıvtik hattamany ratıfıkatsııalaý rásimderin aıaqtaýdy tapsyrdy. Fakýltatıvtik hattamany ratıfıkatsııalaý BUU Múgedekterdiń quqyqtary jónindegi komıtetiniń múgedektigi bar adamdardyń jeke habarlamalaryn (shaǵymdaryn) qabyldaý jáne qaraý quzyretin moıyndaýdy bildiredi. Hattamaǵa sáıkes, múgedektigi bar azamattar Konventsııanyń erejeleri buzylǵan jaǵdaıda, osy Komıtetke habarlamamen nemese shaǵymmen júgine alady», - dedi vedomstvo basshysy.

Eger kelip túsken shaǵym nemese habarlama boıynsha Konventsııada bekitilgen quqyqtardyń edáýir nemese júıeli túrde buzylǵanyn kórsetetin anyq aqparat alynsa, onda Komıtet óz usynymdaryn tıisti múshe memleketke jáne ótinish berýshige jiberedi.

Áreket algorıtmi kelesideı bolady:

1) usynym Syrtqy ister mınıstrligine kelip túsedi;

2) Mınıstrlik ony Bas prokýratýraǵa joldaıdy;

3) Bas prokýratýra ýákiletti organdarmen birge usynymǵa quqyqtyq taldaý jasap, óz uıǵarymyn Ádilet mınıstrligine jiberedi;

4) Ádilet mınıstrligi bul uıǵarymdy vedomstvoaralyq komıssııada qarap, sheshim shyǵarady;

5) Ádilet mınıstrligi osy sheshimge sáıkes, Qazaqstannyń ustanymyn Komıtetke jetkizetin bolady.