Elimizde muǵalim, dáriger, polıtseı týraly serıaldar túsiriledi

NUR-SULTAN. QazAqparat –Qazaqstandyq jańa serıaldar pedagog pen dárigerdiń, polıtseılerdiń mártebesin kóterýge baǵyttalady. Bul týraly Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat tilshisi.

«Sonymen qatar, serıaldyq ónimniń qazaqstandyq túsirilimderin jalǵastyrýdamyz. Bıylǵa 42 serıaldyń túsirilimi josparlanǵan», - dedi mınıstr Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda.

Osy oraıda jańa týyndylar otbasylyq qundylyqtar, volonterler qyzmeti jaıynda bolady. Sonymen qatar, pedagog pen dárigerdiń, polıtseılerdiń mártebesin kóterýge baǵyttalǵan, salaýatty ómir saltyn nasıhattaýǵa arnalǵan serıaldarǵa basymdylyq qoıylyp otyr.

Budan buryn habarlanǵandaı, kópshilikke yńǵaıly bolýy úshin Memlekettik baǵdarlamalardyń ortaq portaly iske qosylýda.

Bıyl «Abaı TV» jáne «Ál-Farabı» eki jańa telearna ashylady. Bul telearnalar mádenıettiń baılyǵy men murasyna arnalǵan jańa bilim berý-aǵartýshylyq televızııalyq joba bolmaq.