Elimizde medıtsınalyq avıatsııa qyzmetterine tarıf ósedi

NUR-SULTAN. QazAqparat – Qazaqstanda medıtsınalyq avıatsııada jańa úlgidegi ushaqtarǵa ruqsat berilmek. Bul jaıynda senatorlardyń depýtattyq saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Medıtsınalyq avıatsııa qyzmeti – jol-kólik oqıǵalarynyń saldarynan bolatyn ólimdi tómendetýge, akýsherlik patologııasy bar áıelderge, týa bitken damý kemistigi bar balalarǵa, qan aınalymy júıesi aýrýlary bar patsıentterge jáne basqa da shuǵyl medıtsınalyq kómek kórsetýge baǵyttalǵan. Densaýlyq saqtaý mınıstrligi medıtsınalyq avıatsııaǵa beıimdelgen qazirgi zamanǵy áýe kemelerin (medıtsınalyq modýlmen jabdyqtalǵan) tartý jáne ushýdyń jańa baǵyttaryn (áýe jelilerin) qurý, qolda bar borttardyń tehnıkalyq quramyn jaqsartý úshin avıatsııalyq qyzmetterge tarıfterdi ulǵaıtý máselesin pysyqtaýda. Osy maqsatta 5,4 mlrd teńge somasyna qosymsha qajettilikke bıýdjettik ótinim ázirlendi. Ol 2021 jylǵa arnalǵan respýblıkalyq bıýdjetti naqtylaý kezinde zańnamada belgilengen tártippen qaralatyn bolady, - dedi Asqar Mamın.

Úkimet basshysynyń jaýabyna qosa berilgen anyqtamaǵa sáıkes, el ishindegi avıatsııalyq qyzmetterge qatysty kelesi tarıfterdi ulǵaıtý kózdelýde:

- AN-2 ushaǵynyń qyzmeti (17 birlik) – tarıf 1 saǵat úshin 270 000 teńgeden 328 000 teńgege deıin;

- AN-24 ushaǵynyń qyzmeti (1 birlik) - tarıf 1 saǵat úshin 896 000 teńgeden 1 087 000 teńgege deıin;

- ıAK-40 (2 birlik) ushaǵynyń qyzmeti – tarıf 1 saǵat úshin 1 091 950 teńgeden 1 328 000 teńgege deıin;

- Pilatus PC-12, Piaggio Avanti EVO úlgisindegi jańa áýe kemesin paıdalanýǵa ruqsat etý (tarıf – 1 saǵat úshin 1750 000 teńge);

- TwinOtter 400, L-410-250 úlgisindegi jańa áýe kemesin paıdalanýǵa ruqsat etý (tarıf – 1 saǵat úshin 760 000 teńge);

- Hawker 800/900, Dornier-328, Bombardier CRJ-200, Pilatus PC-24-350 úlgisindegi jańa áýe kemesin paıdalanýǵa ruqsat etý (tarıf – 1 saǵat úshin 2 120 000 teńge).

«Sonymen qatar, Densaýlyq saqtaý mınıstrligi memlekettik tapsyrmany oryndaý aıasynda «Ulttyq shuǵyl medıtsınany úılestirý ortalyǵy» respýblıkalyq memlekettik kásiporynynan qosalqy merdigerge bólinetin bıýdjet qarajatynyń úlesin ulǵaıtýǵa qatysty Bıýdjet kodeksine ózgerister engizý máselesin belgilengen tártippen pysyqtaýda», - dedi Premer-Mınıstr.