Elimizde máslıhattardyń ókilettigi keńeıtilmek – zań jobasy

ASTANA. QazAqparat – Barlyq deńgeıdegi máslıhattardyń mártebesin kóterý eskerilip otyr. Bul týraly Májiliste «Qazaqstandaǵy jergilikti ózin-ózi basqarý týraly» zań jobasyn tanystyrý kezinde Ulttyq ekonomıka vıtse-mınıstri Baýyrjan Omarbekov aıtty, dep habarlaıdy QazAqparat tilshisi.

«Barlyq deńgeıdegi máslıhattardyń mártebesin kóterý maqsatynda qosymsha ókilettikter beriletin bolady. Bul turǵyda ákimderdiń halyqpen kezdesýlerinde kóterilgen problemalardy ákimdikterdiń sheshýi barysyna monıtorıng júrgizý, qoǵamdyq tártipti qamtamasyz etýge qatysatyn azamattarǵa aqshalaı syıaqy mólsherin aıqyndaý, depýtattardyń ákimdiktiń bıýdjettik komıssııalarynyń jumysyna qatysýy, sondaı-aq qajet bolǵan jaǵdaıda bıýdjetti naqtylaýǵa bastama jasaý quqyǵyn berý eskerilgen», - dedi B. Omarbekov.

Onyń aıtýynsha, máslıhat tóraǵasynyń jáne máslıhat apparaty basshysynyń ákimshilik ári uıymdastyrý máseleleri boıynsha ókilettikteri de qaıta qaraldy.

Budan bólek, tekserý komıssııalarynyń qyzmetin kúsheıtý eskerilgen. Osy oraıda, Joǵary aýdıtorlyq palatany qarjylandyrý tártibine uqsas tekserý komıssııasyn qarjylandyrýdyń jeke tártibi qoldanylmaq.

Budan buryn habarlanǵandaı, búgin Májiliste tanystyrylǵan zań jobasy aıasynda Qazaqstanda aýyldyq okrýg keńesterin qurý josparlanyp otyr.

Budan bólek, aýyl ákimi men onyń apparatyna qosymsha fýnktsııalar berilmek.

Sonymen qatar, Qazaqstan aýmaǵynda qalalyq ózin-ózi basqarý keńesteri qurylady. Bul rette elorda, respýblıkalyq jáne oblystyq mańyzy bar qalalar deńgeıinde qarastyrylyp otyr.