Elimizde mashına jasaý óndirisi 9,4%-ke artqan

NUR-SULTAN. QazAqparat – Jyl basynan beri eldegi óndiris kólemi 5,8%-ke artty. Bul týraly QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Óńdeý ónerkásibinde serpindi ósý úrdisi baıqalýda. Osy jyldyń qańtar-sáýir aılarynda óndiris kólemi 5,8%-ke ósti. Barlyq óńir boıynsha oń ósý kórsetkishi tirkeldi. Eń joǵarǵy ósý Almaty qalasynda, sondaı-aq Atyraý jáne Jambyl oblystarynda baıqalýda», - dedi Á. Qýantyrov Úkimet otyrysynda.

Mınıstrdiń aıtýynsha, óńdeý ónerkásibi salalary boıynsha mashına jasaý óndirisiniń 9,4%-ke, onyń ishinde kompıýter, elektrondy jáne optıka quraldar jasaýdyń – 19,7%-ke, avtomobıl jasaýdyń – 18,6%-ke ósýi baıqaldy.

Sondaı-aq qurylys materıaldary – 9,5%-ke, sýsyndar – 18,7%-ke, plastmassa buıymdary – 14,3%-ke, daıyn metall buıymdary – 10,8%-ke, farmatsevtıka ónimderi – 6,4%-ke, kıim óndirisiniń – 13,8%-ke ósýi qamtamasyz etildi. Taý-ken ónerkásibinde óndiris kólemi 4,4%-ke ulǵaıdy.

Salalar bólinisindegi ósim taý-ken ónerkásibinde qyzmet kórsetýde – 16,9%-ti, gaz óndirýde – 6,4%-ti, shıki munaı óndirýde 5%-ti, ózge de paıdaly qazbalardy óndirýde – 4,2%-ti, metall kenderin óndirýde – 1,8%-ti, kómir óndirýde – 1,7%-ti qurady.

Aıta keteıik, jyl basynan beri Qazaqstan ekonomıkasynyń ósý qarqyny 4,4%-ke jetken. Naqty sektordaǵy ósim 5,1%, qyzmet kórsetý salasynda iskerlik belsendilik 3,4%-ke deıin ulǵaıǵan.