Elimizde mamandardy qaıta daıarlaý júrip jatyr – Eńbek mınıstri

NUR-SULTAN. QazAqparat – Elimizde zaman talabyna saı mamandardy qaıta daıarlaý qolǵa alyndy. Bul týraly QR Eńbek jáne halyqty áleýmettik qorǵaý mınıstri Serik Shápkenov málim etti, dep habarlaıdy QazAqparat tilshisi.

«Ótken jyly bizdiń mınıstrlik jańa kásipter atlasyn ázirlep, barlyq mamandyqtar boıynsha taldaý jasaldy. Tsıfrlandyrýǵa kóshý bir jaǵynan keıbir maman ıelerine suranysty azaıtsa, ekinshi jaǵynan zamaýanı mamandyqtar paıda bolyp, jańa jumys oryndary ashylyp jatyr. Mamandyqtar boıynsha taldaý nátıjesi kórsetkendeı, jaqyn arada 239 jańa mamandyq paıda bolyp, 95 mamandyq qaıta ózgeredi jáne 129 mamandyq joıylady eken», - dedi Serik Shápkenov Úkimet úıinde onlaın ótken baspasóz máslıhatynda.

Mınıstrdiń málimetinshe, búginde elimizde zamanaýı mamandyqtardy ıgerý men keıbir maman ıelerin qaıta daıarlaýǵa qatysty sharalar qolǵa alyndy.

«Qazir «Eńbek» platformasynda mamandardy qaıta daıarlaý, onlaın oqytý júrip jatyr. Sondaı-aq, olardy beıimdeý oflaın formatta da júzege asyrylýda. Osy oraıda aıtyp ótetin bir jaıt, mamandyq múldem joıylyp ketpeıdi, tek zaman talabyna saı beıimdelýi tıis. Sol úshin de biz otandyq mamandardy qaıta oqytyp jatyrmyz», - deıdi ol.

Buǵan deıin vedomstvo basshysy kepildendirilgen áleýmettik paket aıasynda az qamtylǵan otbasylarǵa beriletin azyq-túliktiń sapasyna qatysty synǵa jaýap berdi.

Odan bólek, Serik Shápkenov Qazaqstanda bala sanyna qaramaı teńdeı járdemaqy berý máselesine qatysty pikir bildirdi.

Onyń aıtýynsha, búginde elimizde ana men balany qorǵaý baǵytynda birqatar keshendi sharalar qarastyrylǵan.