Elimizde maqta ósirý salasyndaǵy kedergiler aıqyndaldy

NUR-SULTAN. QazAqparat - «Maqta salasyn damytý týraly» Qazaqstan Respýblıkasy zańynyń kúshi joıyldy dep taný jáne Qazaqstan Respýblıkasynyń keıbir zańnamalyq aktilerine ózgerister engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Atalǵan zań jobasy maqta salasyndaǵy ákimshilik kedergilerdi azaıtý jáne qarjy uıymdarynyń kredıttik resýrstaryn qosa alǵanda, ınvestıtsııalar tartý úshin jaǵdaı jasaý maqsatynda ázirlendi.

«Maqta salasyn damytý týraly» zańynyń quqyq qoldaný praktıkasyna júrgizilgen taldaý salalyq zańda kózdelgen salany memlekettik retteý quraldary – maqta qolhaty jáne ony qamtamasyz etý jónindegi sharalar salany damytatyn qozǵaýshy kúshke aınalmaǵanyn kórsetti», - delingen qujat boıynsha ázirlengen qortyndyda.

Zańnamada kózdelgen maqta qolhattaryn qamtamasyz etý jónindegi júıe salanyń sýbektileri arasyndaǵy kedergi bolyp otyr. Al bul óz kezeginde saladan ınvestıtsııalar men aqsha qarajatynyń ketýine jáne onyń barlyq negizgi kórsetkishteriniń tómendeýine alyp keledi.

Májilisiniń depýtaty Sáken Qanybekovtyń aıtýynsha, salanyń toqyraýyn týǵyzatyn problemalar maqta ósirýshilerdiń, ýákiletti memlekettik organdardyń, jergilikti memlekettik organdardyń ókilderi men QR Parlamenti depýtattarynyń qatysýymen ártúrli dıalog alańdarynda birneshe ret talqylandy. Barlyq derlik múddeli taraptar salanyń tartymdy bolmaýy onyń shamadan tys ári tıimsiz rettelýinen týyndap otyr degen pikirge toqtady.

Osyǵan baılanysty, saladaǵy problemalardy zańnamalyq turǵydan sheshý maqsatynda Parlament depýtattary osy zań jobasyn ázirledi, onda bir mezgilde qoldanystaǵy zańnamanyń normalaryna tıisti ózgerister engize otyryp, salalyq zańnyń kúshin joıý arqyly maqta qolhattary júıesin qaıta retteý usynylady.

Taratylǵan málimetke qaraǵanda, maqta qolhattaryn shyǵara otyryp, qoıma qyzmeti boıynsha qyzmetter kórsetý jónindegi maqta óńdeý uıymdarynyń qyzmetin lıtsenzııalaý alyp tastalady.