Elimizde qurylys jobalarynyń quny onlaın kalkýlıator arqyly eseptelinedi

NUR-SULTAN. QazAqparat – Endigi ýaqytta memlekettik tapsyrys aıasynda salynatyn qurylys jobalarynyń quny onlaın kalkýlıator arqyly aldyn ala eseptelip, quny belgilenedi. Qurylys salasyndaǵy atalǵan jańa qyzmet týraly QR Indýstrııa jáne ınfraqurylymdyq damý mınıstrliginiń birinshi vıtse-mınıstri Qaıyrbek Óskenbaev aıtyp berdi, dep habarlaıdy QazAqparat tilshisi.

«Qurylys salasyndaǵy jumystyń ashyqtyǵyn tsıfrlandyrý arqyly ǵana qamtamasyz ete alamyz. Osy oraıda biz elimizdegi qurylys salasyn jobalaýdan bastap, qoldanysqa berýge deıingi protsesti tolyqtaı avtomattandyrýmen aınalysyp jatyrmyz. Mysaly, halyq bizden suraıdy nege jobasy, qurylys materıaly birdeı nysandardyń baǵasy ár óńirde ártúrli. Osy máseleni retteý maqsatynda, memlekettik saraptaý aıasynda qurylys salasynda onlaın kalkýlıatordy iske qostyq. Endigi ýaqytta tapsyrys berýshi onlaın kalkýlıatorǵa jańa qurylys nysanynyń barlyq kórsetkishterin engizedi, al kalkýlıator avtomatty túrde jobanyń qunyn shyǵaryp beredi. Osylaısha qurylys jobasyn ázirleý kezinde baǵany ósirý nemese ózgertý múmkin bolmaıdy. ıAǵnı joba avtory qurylys nysanyn josparlaý barysynda artyq qadamǵa bara almaıdy», - dedi Q. Óskenbaev baspasóz máslıhatynda.

Vıtse-mınıstrdiń sózine sensek, onlaın kalkýlıator qurylys obektisiniń shekti qunyn jyldam esepteýge múmkindik beredi jáne ol memlekettik saraptama portalynda tirkelip, bekitilgen.

Buǵan deıin mınıstr orynbasary otandyq qurylys salasyndaǵy jańa aqparattyq júıe jumysyn tanystyrdy.

Odan bólek, Q. Óskenbaev salynyp jatqan qurylys nysandarynyń barysyn baqylaıtyn ahýaldyq ortalyqtyń qurylǵanyn habardar etti.