Elimizde qurylys materıaldarynyń baǵasy qanshaǵa qymbattady

NUR-SULTAN. QazAqparat –QR Básekelestikti qorǵaý jáne damytý agenttigi «QazAqparat» HAA alańynda ótkizgen bastapqy turǵyn úı naryǵyndaǵy básekelestik týraly Open Space-te qurylys materıaldarynyń baǵasy qanshama qymbattaǵandyǵy aıtyldy, dep habarlaıdy QazAqparat tilshisi.

«Statıstıkaǵa súıensek, 2021 jyldyń qańtar-sáýir aılarynda otandyq materıaldar baǵasynyń ósýi 16% -dy, qurylys kompanııalary satyp alatyn materıaldardyń qymbattaýy 0,5% -dy qurady. 2020 jyldyń sáıkes kezeńinde ósim 0,2%-dy quraǵan bolatyn», - dedi QR Básekelestikti qorǵaý jáne damytý agenttiginiń tóraǵasy Serik Jumanǵarın.

Onyń aıtýynsha, qurylys materıaldary Qaraǵandy oblysynda kóbirek qymbattaǵan.

«10 paıyzdyq ósim jalǵasýda, negizinen bul osy jyldyń sáýirinde Qaraǵandy oblysynda baǵanyń ósýimen baılanysty. Búgingi tańda baǵa boıynsha barlyq jaǵdaı saraptalýda», - deıdi ol.

Eske sala ketsek , buǵan deıin qurylys materıaldarynyń qymbattaýy turǵyn úı naryǵyna áser etip jatqany týraly jazǵan bolatynbyz.