Elimizde kúnbaǵys maıy men kartopty eksportqa shyǵarýǵa shekteý qoıylǵan
«Naryqty kúnbaǵys maıymen qamtamasyz etý týraly aıtsaq, 1 naýryzdaǵy jaǵdaı boıynsha respýblıkada qaıta óńdeýge jiberiletin 649 myń tonna kúnbaǵys bar. Kúnbaǵys maıynyń qory óńirlerde 30,6 myń tonnany quraıdy. Osylaısha, ishki naryq tolyǵymen kúnbaǵys maıymen jáne ony óndirýge arnalǵan shıkizatpen qamtamasyz etilgen», - dedi J. Óserbaı ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, kókónis daqyldary men kartop qory naryqqa erte pisetin kókónister túspeıtin kezeńde de halyqtyń qajettiligin qamtamasyz etýge jetkilikti.
Sonymen qatar, qazirgi ýaqytta maıdyń, kúnbaǵys tuqymdarynyń jáne kartoptyń eksportyna shekteý engizilgen.
Buǵan deıin Jeńis Óserbaı eldegi áleýmettik mańyzy bar azyq-túlik qory týraly aıtyp bergen edi.
Ákimdikterdiń jedel derekterine sáıkes, 12 naýryzdaǵy jaǵdaı boıynsha respýblıkada barlyǵy 1,3 mln tonna áleýmettik mańyzy bar azyq-túlik bar.
Onyń ishinde un – 144 myń tonna, qant – 90 myń tonna, kúrish – 39,3 myń tonna, makaron – 21 myń tonna jáne shamamen 900 myń tonna kókónis ónimderi jáne basqalary bar.
Sonymen birge, Qazaqstanda shamamen 90 myń tonna qant qory bar jáne respýblıka qantpen tolyq qamtamasyz etilgen.
Ulttyq statıstıka bıýrosynyń resmı derekterine sáıkes, 2022 jylǵy 1 naýryzdaǵy jaǵdaı boıynsha respýblıkada 9,1 mln tonna dándi jáne dándi-burshaqty daqyl qory bar.