Elimizde koronavırýsqa shaldyqqandardyń 33 paıyzdan astamy - balalar

NUR-SULTAN. QazAqparat – Elimizdiń birqatar óńirindegi aýrýhanalardaǵy ınfektsııalyq tósek-oryndardyń tez tolýy baıqalady. Bul týraly QR DSM Medıtsınalyq kómekti uıymdastyrý departamenti dırektorynyń orynbasary Kúláıim Birjanova aıtty, dep habarlaıdy QazAqparat tilshisi.

«Densaýlyq saqtaý mınıstrligi koronavırýs ınfektsııasymen aýyrǵan 1 176 naýqasqa saraptama júrgizdi. Olardyń ishinde 18 jasqa deıingi balalar úlesi - 33,7 paıyzdy, al eresekter úlesi - 66,3 paıyzdy quraıdy», - dedi Kúláıim Birjanova ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, respýblıka boıynsha medıtsınalyq-sanıtarııalyq alǵashqy kómek kórsetetin 5 myńnan astam nysan bar.

«Olar - dárigerlik ambýlatorııalar, medıtsınalyq pýnktter, medıtsınalyq-sanıtarııalyq alǵashqy kómek ortalyqtary, emhanalar. 12 myńnan astam pedıatrııalyq, terapevtik ýchaske, jalpy tájirıbe dárigeri bar. Onda shamamen 32 myńnan astam dáriger men 13 myńnan astam orta medıtsınalyq qyzmetker jumys isteıdi», - dedi ol.