Elimizde qorǵaný kostıýmderin shyǵaratyn 3 kásiporyn iske qosylady
11:24, 19 Maýsym 2020
NUR-SULTAN. QazAqparat - Osy jyldyń sońyna deıin qorǵaný kostıýmderin shyǵaratyn 3 kásiporyn iske qosylady. Bul týraly búgin Úkimet otyrysynda QR ındýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.
«Medıtsınalyq qolǵaptarǵa qajettilik 83,7 mln jup qolǵapty quraıdy. Qazirgi ýaqytta eki kásiporyn táýligine 330 myń jup qolǵap shyǵarady. Ári qaraı biz óndiris kólemin táýligine 460 myń jupqa deıin arttyrýdy josparlap otyrmyz», - dedi ol.
Onyń dereginshe, 6 aıǵa qorǵaný kostıýmderiniń qajettiligi 1,3 mln danany quraıdy Óndiris kólemin arttyrý úshin osy jyldyń sońyna deıin 3 jańa kásiporyndy iske qosý josparlanǵan.
«Bul sharalardyń barlyǵy qorǵaný kostıýmderin óndirý kólemin aıyna 800 myń danaǵa deıin jetkizýge múmkindik beredi», - dedi Beıbit Atamqulov.