Elimizde kómir, shıki munaı jáne tabıǵı gaz óndirisi azaıdy

NUR-SULTAN. QazAqparat – Qazaqstanda bir jylda kómir, shıki munaı jáne tabıǵı gaz kenderiniń óndirisi tómendedi. Bul týraly QR Strategııalyq josparlaý jáne reformalar agenttigi Ulttyq statıstıka bıýrosynan málim etti, dep habarlaıdy QazAqparat.

Statıstıka derekterine súıensek, 2021 jylǵy qańtar-shildede 2020 jylǵy qańtar-shildemen salystyrǵanda elimizde tamaq ónimderiniń, sýsyn, rezeńke jáne plastmassa buıymdarynyń, ózge de beımetall mıneraldyq ónimderiniń, hımııa jáne farmatsevtıka ónimderiniń, jeńil ónerkásip jáne mashına jasaý óndirisi artty.

Kerisinshe, kómir, shıki munaı jáne tabıǵı gaz kenderiniń óndirisi tómendedi.

«Ónerkásiptik ónimderdiń óndiris kóleminiń ósýi respýblıkanyń 14 óńirinde baıqaldy», - delingen aqparatta.

2021 jylǵy qańtar-shildede Qazaqstanda 49,7 mln tonna munaı, gaz kondensaty (96,6 paıyz), 71,6 mln tonna mys kenderi (123,2), 1,8 mln tonna un (102,4), 2,7 mln tonna benzın (107,7), 2,9 mln tonna gazoılder (dızeldik otyn) (109,0), 66,1 mlrd kVt saǵ elektr energııasy (120,2 paıyz) óndirildi.