Elimizde kólik salyǵy joıylýy múmkin

ASTANA. QazAqparat – Ulttyq ekonomıka vıtse-mınıstri Azamat Ámrın kólik salyǵyn joıý múmkindigine qatysty pikir bildirdi, dep habarlaıdy QazAqparat tilshisi.

«Bul másele jańa Salyq kodeksi aıasynda talqylanyp jatyr. Ol sán-saltanat salyǵymen birge keshendi túrde qarastyrylady. Shynymen de kólik salyǵyn benzınge arnalǵan aktsızge aýystyrý nusqasy talqylanýda. Biraq, ony tyńǵylyqty qarastyrǵan jón. Óıtkeni, biz saralaımyz. Kólik salyǵy qozǵaltqysh kólemi 4 nemese 3,5 lıtrge deıingi avtomobılder úshin joıý kózdeletin shyǵar. Qazir qosymsha esepteýler júrgizip jatyrmyz», - dedi Azamat Ámrın Úkimet otyrysynan keıin uıymdastyrylǵan brıfıngte.

Onyń atap ótýinshe, kólik salyǵyn benzınge arnalǵan aktsızge aýystyrǵan jaǵdaıda janarmaı baǵasy qymbattaıdy.

«Biz shamamen 80 mlrd teńge kólik salyǵyn jınaımyz, shamamen 5 mln tonna munaı ónimderin paıdalanamyz. Eger kólik salyǵyn benzınge arnalǵan aktsızge aýystyrar bolsaq, onda benzın baǵasy 14 teńgege qymbattaýy tıis», - dedi ol.

Osyǵan deıin Ulttyq banktiń altyn-valıýta rezervteri jyl basynan 4,3 paıyzǵa tómendegeni týraly habarlandy.