Elimizde qoqystan elektr óndiretin stantsııalar salynady
«Qazirgi ýaqytta bıoelektr stantsııalaryn turǵyzý máselesin qarastyrý qajettigin kórip otyrmyz. Bul stantsııalar qatty turmystyq qaldyqtardy óńdeý arqyly jumys isteıdi. Bul sektorda múmkindikter men jeńildikterdi kóbeıtý qajet», - dep atap ótti QR Energetıka vıtse-mınıstri Anatolıı Shkarýpa QR Úkimetinde ótken baspasóz máslıhatynda.
Onyń aıtýynsha, bul elektr stantsııalary qoqys polıgondarynda ornalasady jáne birneshe máseleniń sheshilýine kómektesedi.
«Qatty qaldyqtardy óńdeý jónindegi jobalardan basqa, qoqys polıgondardyń negizinde bıoelektrostantsııalar ornatylady dep kútýdemiz. Bul qoqystardy basqarý, ekologııalyq taza energııany óndirýde qoqysty qaıtalama shıkizat retinde qoldaný syndy birneshe máseleni qatar sheshedi», - dedi ol.
Aıta keteıik, Energetıka mınıstrligi osy jyldan bastap energııanyń balamaly kózderiniń jańa jobalary boıynsha aýktsıon júıesin engizdi. Osy jyldyń mamyr aıynda qýattylyǵy az sanalatyn 10-20 megaVattqa deıingi aýktsıondardyń alǵashqy raýndy sátti ótti. 10 jobanyń 8-i qoldaý tapty. Tıisinshe, endigi kezekte bul jobalar júzege asyrylǵaly jatyr. Ekinshi raýnd osy jyldyń qazanynda ótkizildi jáne onda ınvestorlarǵa jalpy qýaty 15 MVt bolatyn bıoelektr stantsııalaryn turǵyzý usynyldy.