Elimizde kisi óltirý qylmysynyń sany azaıǵan - statıstıka

ASTANA. QazAqparat - Qazaqstanda qoǵammen áriptestikte qoǵamdyq qaýipsizdikti qamtamasyz etýdiń 2024-2028 jyldarǵa arnalǵan tujyrymdamasy bekitilmek. Tıisti tujyrymdama Ashyq NQA portalynda qoǵamdyq talqylaý úshin jarııalandy, dep habarlaıdy QazAqparat.

Qazaqstandaǵy qylmystyń dınamıkasyna, qurylymyna jáne deńgeıine qatysty qylmystyq-quqyqtyq statıstıkany taldaý 5 jyl ishinde (2018-2022 jyldar) elde qylmystyq quqyq buzýshylyqtar sanyn azaıtýdyń turaqty úrdisi saqtalǵanyn kórsetedi. Máselen, 2018 jyly 292,2 myńqylmys tirkelse, 2022 jyly ol 157,4 myńǵa deıin azaıǵan.

Osy kezeńde qylmystyq quqyq buzýshylyqtardan zardap shekken adamdardyń sany 1,7 esege qysqardy (2018 jylǵy 242,8 myńnan 2022 jyly 136,9 myńǵa deıin). Qylmystan zardap shekken áıelder sany 116,7 myńnan 64,1 myńǵa deıin, erler sany 126,1 myńnan 72,8 myńǵa deıin qysqardy.

Elimizde zorlyq-zombylyq qylmystarynyń tómendeýi baıqalady. Qylmystyq qol suǵýshylyqtan qaza tapqan adamdardyń sany 2546-dan 2358-ge deıin azaıdy.

Jalpy, taldanyp otyrǵan kezeńde kisi óltirý sany 823-ten 520-ǵa deıin, densaýlyqqa qasaqana aýyr zııan keltirý - 2198-den 1840-qa deıin, zorlaý - 3 esedeı (1130-dan 386-ǵa deıin) qysqardy. Paıdakúnemdik-zorlyq-zombylyq qylmystarynyń, onyń ishinde qaraqshylyq (580-den 177-ge deıin), tonaý (8091-den 2404-ke deıin) jáne urlyq (180,1 myńnan 58,8 myńǵa deıin) sany 3 eseden asa azaıdy.