Elimizde kıber polıtsııa qyzmeti iske qosylady – Marat Ahmetjanov
Jańa qyzmet ıeleri IT tehnologııalardy meńgergen kásibı mamandardan jasaqtalady. Internet alaıaqtarǵa tap bolǵan jábirlenýshilerdi tirkep, aqshasyn saqtap qalýǵa arnalǵan sharalardy sol jerde qabyldaıdy. Banktik esepshotyn buǵattaýǵa kómek beredi.
«Eýropa keńesiniń kompıýterlik qylmystar týraly konventsııasyna usynys berdik. Bizdi kúzge jaqyn qabyldaıyn dep jatyr. Onda múshe 66 el bar. Sonyń barshasy da bizge quqyqtyq kómek beredi. Birlesip tergeý amaldaryn júrgizip, alaıaqtyqtyń jolyn kesemiz», - dedi Marat Ahmetjanov.
Kezdesýde mınıstr elimizdegi ınternet alaıaqtyqtyń 5 ese óskenin aıtyp ótti. 2018 jyly 4 000 bolsa, 2022 jyly 20 000-ǵa kóbeıgen. Al osy jyldyń basynan beri bul baǵytta 8000 qylmys tirkelgen. Túrkistan oblysynda 5 aı ishinde 149 ınternet alaıaqtyq qylmysy bolǵany anyqtaldy.
«Tehnologııalar men onlaın qyzmetterdiń damýyna baılanysty alaıaqtar múmkindikterdi paıdalanyp, halyqtyń atynan nesıe alyp jatyr. Halyqtyń jınaǵan qarajatyn jaratýda. Qazir alaıaqtar sheteldik nómirmen telefon soǵady. Buryn qazaqstandyq nómirmen baılanysatyn edi. Biz zerttedik. Operatorlarmen memorandým jasap, jalǵan nomerlerdi buǵattadyq. Osylaısha 5 aıdyń ishinde 18 jarym mıllıon Qazaqstan azamatyn jalǵan telefon qońyraýynan saqtap qaldyq», - dedi mınıstr.
Sondaı-aq Marat Ahmetjanov Ýkraınada otyryp qazaqstandyqtardyń esepshottoryndaǵy qarjysyn jymqyryp kelgen qylmyskerlerdiń joly kesilgenin málimdedi.
«10 mlrd-tan astam qarajatymyz shetelge ketip qalǵan. Sonyń sońynan bardyq. Alaıaqtar Ýkraınada úlken kol ortalyq ashyp alǵan eken. Úsh aýyssymmen jumys istep, Qazaqstannyń azamattaryn aldap, aqshalaryn alyp otyrǵan. Zeınetkerlerdiń, muǵalimderdiń, dárigerlerdiń qarajatyn jymqyryp kelgen. Sonyń jolyn kestik», - dedi mınıstr.