Elimizde kásiporyndardyń iskerlik belsendilik ındeksi tómendedi

ASTANA. QazAqparat – Qazaqstanda ónim shyǵarýdyń zattaı túri azaıǵan. Bul týraly QazAqparat Ulttyq statıstıka bıýrosyna silteme jasap habarlaıdy.

Ótken toqsanmen salystyrǵanda 2022 jyldyń III toqsanynda ónim shyǵarýdyń zattaı túri azaıdy. Esepti kezeńde daıyn ónimge suranys shamaly ósti. Osylaısha suranystyń ózgerýin baǵalaý balansy 3%-dy, óndiris ózgerýin baǵalaý balansy 2%-dy qurady (2022 jyldyń II toqsanynda tıisinshe 2% jáne 5%).

2022 jyldyń III toqsanynda júrgizilgen saýalnamalyq zertteý nátıjeleri boıynsha alynǵan ónerkásiptik kásiporyndardyń iskerlik belsendiligin sıpattaıtyn kásipkerlik senimdilik ındeksi tómendep, 5%-dy qurady. Bul rette ónerkásiptik kásiporyndardyń 69%-y qazirgi sátpen salystyrǵanda qarjy-sharýashylyq qyzmettiń ózgermeıtindigin, 13%-y jaqsarýdy jáne 9% -y nasharlaýdy kútedi.

Sonymen qatar aldyńǵy toqsanmen salystyrǵanda tutynýshylyq suranys ózgerissiz qaldy. 2022 jylǵy III toqsandaǵy suranystyń ózgerýin baǵalaý balansy ekinshi toqsanmen salystyrǵanda -4% (2022 jylǵy II toqsanda -4%) qurady, taýar aınalymy kólemin baǵalaý balansy 1%-dan 0%-ǵa deıin tómendedi.

Saýda kásiporyndarynyń iskerlik belsendiligin sıpattaıtyn kásipkerlik senimdilik ındeksi -2%-dy qurady. Mundaı aıtarlyqtaı tómendeýge suranys pen ekonomıkalyq jaǵdaıdyń turaqsyzdyǵy áser etti.

Saýda kásiporyndarynyń jartysynan kóbi – 61% aǵymdaǵy sátpen salystyrǵanda qarjy-sharýashylyq qyzmettiń ózgermeıtindigin kútedi, 14% jaqsarady jáne 11% nasharlaıdy dep boljanýda.

Qurylys kásiporyndarynyń basshylary 2022 jyldyń III toqsanynda 2022 jyldyń II toqsanymen salystyrǵanda ekonomıkalyq jaǵdaıdyń nasharlaǵanyn atap ótti. Máselen, tapsyrystar portfeliniń baǵalaryn ózgertý balansy aldyńǵy toqsanmen salystyrǵanda azaıyp, 2%-dy qurady. Oryndalatyn jumystardyń naqty kóleminiń ózgerýin baǵalaý balansy 7%-dan 2%-ǵa deıin tómendedi.

Alynǵan qurylys kásiporyndarynyń iskerlik belsendiliginiń ózgerýin sıpattaıtyn kásipkerliktiń senimdilik ındeksi ózgergerdi jáne (-4%)-dy qurady.

Qurylys kásiporyndarynyń 67%-y qarjylyq-sharýashylyq belsendiliktiń aǵymdaǵy kezeńmen salystyrǵanda ózgerissiz qalatynyn, 9%-y jaqsaratynyn jáne 11%-y nasharlaýyn kútedi.