Elimizde qant óndirý kólemi 490 myń tonnaǵa deıin jetkizilmek

ASTANA. QazAqparat – Búgin Májiliste ótken Úkimet saǵatynda Aýyl sharýashylyǵy mınıstri Erbol Qarashókeev qant óndirý kólemin kóbeıtýge qatysty ınvestor tartý kelissózderi júrip jatyr, dep habarlaıdy QazAqparat tilshisi.

«Óndiristik múmkindikke toqtalsaq, qazirgi kezde Qazaqstanda qant qyzylshasyn óńdeýge qatysty táýligine qýaty 8 myń tonna jáne quraq qanty shıkizaty boıynsha 2 myń tonna bolatyn 4 qant zaýyty (Almaty oblysyndaǵy Aqsý kanty men Kóksý qant zaýyty, Jambyl oblysyndaǵy Merki jáne Taraz qant zaýyttary) jumys istep tur. Olar 2022 jyly ishki tutyný 555 myń tonna bolǵanda, 283 myń tonna qant óndirdi. Memleket basshysynyń tapsyrmasy aıasynda azyq-túlik qaýipsizdigin qamtamasyz etý, otandyq qant óndirisin ulǵaıtý jáne ımportqa táýeldilikti tómendetý maqsatynda Pavlodar oblysynyń ákimdigi Aqsý qalasynda agroındýstrıaldy park aýmaǵynda qýattylyǵy jylyna 150 myń tonnalyq qant zaýytynyń qurylysyn júzege asyrady», - dedi E. Qarashókeev.

Osy oraıda ol jobanyń tehnıkalyq-ekonomıkalyq negizi aıasynda tıisti qujat ázirlengenin, Indýstrııalyq park aýmaǵynda zaýyt qurylysyna jer ýchaskesi (70 ga) bólingenin aıtty.

«Qant óndirýde quzyreti men tájirıbesi bar ınvestordy tartý úshin zaýyttyń qurylysyna Calik Holding, YDA Group, Champion Foods, Murban, Rusagro, Inoks Capital sııaqty shetel kompanııalarmen kelissóz júrgizilip jatyr. Orta merzimdegi perspektıvada qant óndiriýdi 283 myńnan 490 myń tonnaǵa deıin ulǵaıtý josparlanyp otyr. Bul rette egis alqaptaryn 12 myńnan 38 myń gektarǵa deıin jetkizý esebinen otandyq shıkizattan qant óndirý 33 myńnan 250 myń tonnaǵa deıin artady. Nátıjesinde ishki naryqtyń qamtamasyz etilýi 51%-dan 83%-ǵa deıin jetkizilmek», - dedi vedomstvo basshysy.

Budan buryn habarlanǵandaı, Qazaqstanda qantty júgeri men bıdaıdan óndirý usynyldy.

Aýyl sharýashylyǵy mınıstri qant ımportyn azaıtýǵa qatysty pikir bildirdi.