Elimizde qant qymbattaýy múmkin be

ASTANA. QazAqparat – Qant baǵasynyń ósý qaýpi bar ma? Tapshylyq bola ma? Bul saýaldarǵa Premer-Mınıstrdiń orynbasary, Saýda jáne ıntegratsııa mınıstri Serik Jumanǵarın jaýap berdi, dep habarlaıdy QazAqparat tilshisi.

«Áýelde qanttyń kóterme baǵasynyń eń tómengi deńgeıin engizgimiz keldi, ázirge toqtadyq. Óıtkeni, qant qymbattap jatyr. Bizde qant óndirisi Reseıge qaraǵanda qymbatqa túsedi. Ázirge reseılik qant arzan, degenmen biz ázirge jaǵdaıdy qalypta ustaýdy jón kórdik. Otandyq qant zaýyttaryn qoldaý sharalary qazir pysyqtalyp jatyr. Ázirge qant baǵasynyń bosańsýyna jol bermeý úshin óndirýshini sýbsıdııalaý nusqasyn ǵana qarastyramyz», - dedi Serik Jumanǵarın Úkimet otyrysynan keıin BAQ ókilderiniń saýalyna.

Sondaı-aq, mınıstr shıkizattyń qymbattaǵanyn aıtty.

«Máseleni sheshýde uzaqmerzimdi perspektıva tıimdirek. Árıne, qazir jaǵdaı óte tıimdi – qant arzan. Biraq bizdiń zaýyttar qoımadaǵy qantty sata almaı otyr. Sebebi óndiris quny óte qymbat. Óıtkeni shıki qant bırjalarda qatty qymbattady. Qant tapshylyǵy qaýpi joq, al qymbattaý boıynsha máseleni qarastyramyz», - deıdi ol.